不願做木偶？

皇親欲扯線

知縣不咬絃

寧交眼中釘

拒上賊公船

昨晚在榕樹頭聽講古佬雙番東講、縣令林大孖與班親王「特別是文親王和恭親王」不咬絃、已經由枱底鬧到上枱面。據某位親兵講、林大孖出席白鴿會江湖壽宴期間、為着討好坐館爺白鴿韋而一擇萬金買一張白鴿標、卻冷待班親王。更甚者、就係林大孖心腹衛生部長岑笑痴眼高於頂目中無人、派遣其副手崔得意向到訪嘅親王府代表講、任何事都可以在正式會議時擺上枱面講、不必私底下傾喎！咁樣一講、氣得班親王眼凸兼氣窒、登時谷滿一肚子氣。

嗱、唔怪得班親王嬲架、早前縣太爺擺出一副回應唯美派要求嘅模樣、從銀庫中提咗五百億両銀出來補貼書齋開支、使得唯美派書齋代表聶斷絃獨領風騷、親王們卻只能尷尬地在門外看。更激氣就係、當班親王邀請岑笑痴到地保會開會甩底都唔在講、連神約佢去參加天媽大醫館開嘅畀面派對都甩底、分明係要今班親王難看。咁你話嘞、班友係咪㷫過焫雞？

江湖早就流傳、班親王自恃有功於朝廷、經常對縣太爺指手劃腳、當正人家係扯線公仔咁舞。然而、這任縣太爺林大孖卻不吃這一套、所以使出一招親唯美派而疏親王黨、以示自己不是他們的扯線公仔喎！講到這裡、雙番東話夠鐘收工、下回再講喎！