2014年6月30日星期一

霸王硬上弓是真的嗎?



知人知事不知真
群雄搏懵有乾坤
今在台前演大戲
回到幕後兩家親

呢嗱、開講都有話、老千計狀元才吖嘛、今期人民公舍大劇院就做齣好戲過你睇。連日來在全城擾攘多時的「大東北發錢計劃」前期撥款終於獲得通過。據說在表決期間、主持人烏星星、建仔、民仔合力演出一齙霸王硬上弓、結果在一遍兵荒馬亂沙塵滾滾嘅情況之中打開大東北發錢之門。

2014年6月27日星期五

定額罰款無助改善阻街



從前阻街有人拉
今日衙門各食齋
定額罰款歡迎你
先行立法再出街

呢嗱、政府度咗條新橋、以定額罰款對付店鋪阻街、並將議案交由議事堂審議。睇嚟今次政府學精咗、曉得將個波交由議事堂去踢、以後無論是吉是凶都唔使由政府獨個兒孭上身吖嘛!講真啦、如果定額罰款真係 work 嘅、又何須等到今時今日才去做?依在下睇、呢條 C 橋旨在搵個部門孭隻鑊上身、但做落去可能會衰過做女嗰陣時。事關定額罰款呢家嘢係無「因人而罰」嘅功能、無論被告人犯法幾多次都只係照單交錢搞掂。然而將被告人送上法庭就唔係咁輕鬆、事關法官見被告人犯法次數越多便罰款越多。咁你話嘞、定額罰款嘅阻嚇嘅力度係唔係比前大大減弱咗呢?

2014年6月24日星期二

強吞必哽

近日見頭痕
占卜又拜神
紅家一句話
諸家喪三魂

據報導指出、在剛過去的周日、真民聯主辦的「傳聞電子公投」參加者數字已經累積超過七十萬人、其中四萬多人是親身前往票站投票。如果數目真確的話、今次公投已創下歷年群眾運動參加人數新高。阿建立刻跑出來指、有人利用電腦程式造假報大數、而那份半官方嘅蠻球日報亦當眾放屁、形容即使支持公投嘅紫荊人更多、也沒有祖家十三億人的多。這類恐嚇言論、莫講話阿民聽來火紅火綠、即使是在下這類一向冇表態嘅小市民聽後也為之扯火。不過今次督爺一見唔對路便彈出來解話、以求達到降溫效果。點知又被抽水政棍食住上、插一餐飽嘅、都可謂該燴咯!

2014年6月21日星期六

洗腦話戰中



洗腦無分敵我親
你情我願加一分
天書壓下氹氹轉
大石難擋幼嫩群

自從阿爺將那部教你點樣三拳合一嘅心法(拔皮書)拋出江湖之後、城中立即激起新一輪洗腦熱話。教館部主管唔得掂下令全城教館必須指導小學員背誦拔皮書、而教頭協會則認定此書旨在洗腦、容易令小學員人走火入魔、是絕對背誦不得的。之不過在幾年前曾經領頭反對二阿爺(即當今紅家爺爺)提出行企、撕法、勒法三拳合一嘅長角猿(當時大撞公會坐館爺、今日的戒律部主管)解釋拔皮書是一部能令背誦者學得一套絕世心法、而三拳合一就能將武功融會貫通、只要熟習心法和三拳即成自講奇才。呢嗱、雖然同一宗事件、但當人在不同崗位就會有不同演繹、因此對政治人物所講嘅嘢不宜太認真呀!知冇?

2014年6月17日星期二

刮龍世界




你刮我又刮
連嘴都唔抹
大話說幾回
能使黑變白

今年黃金周假期顯示、祖家遊客數字比往年同期下降一成二、而且旅客消費方亦見下調、有人將責任推到趕客幫身上去、不過在下對此等說法不敢茍同、唔知你又點睇?並不是在下存心靠嚇、其實這不過是剛剛開始、明年黃金周將會見真章。以目前形勢看來、祖家整體經濟放緩、人們消費意欲下降、加上寶島、高麗、以及東南亞等地的接待訪客能力優於紫荊城、景點、購物等方面亦具相當吸引力、更多人願意選擇那些地方作為渡假好去處是不難想像的。因此紫荊城是否削滅自由行旅客數字已經無關宏旨矣!

2014年6月14日星期六

曾大媽的控訴

阿仔唔生性
存心專呃秤
有難冇人扶
前因今報應

日前在鵝頸橋見到曾大媽起勢咁翳兩耳婆替佢打小人、而兩耳婆卻一味左推右搪係都唔肯。在下覺得甚是有趣、於是走前去問兩耳婆點解有生意都唔做、但她反問我到底知唔知到曾大媽搵佢做乜?我梗係知搵佢打小人啦、只係唔知點解佢有生意都唔做啫、於是喊佢講出原委。點知兩耳婆尚未開口、曾大媽就搶先話、係搵兩耳婆替佢個寶貝仔啱曾打小人、但係兩耳婆唔肯做佢生意喎!

2014年6月10日星期二

毛毛入冊


長髮為君剪
法債為君填
如今通櫃去
月後再團圓

毛毛在69日就三年前91日帶領幫眾衝擊「銻煲機制論壇」一案上訴失敗、即時被判入荔枝角大花廳演唱「鐵窗雄淚」四個星期。只見毛毛被兩名獄卒由刑堂押上囚車、而他老人家的一束長髮被剪去、而且髮腳被剷得高高的、看起來人似是清爽了、但神情卻憔悴了!幸好刑部大老爺只判毛毛入冊28日、假如超過一個月的話、可能連人民代表嘅資格亦會喪失、即是說每個月大拿拿八萬銀就此化為烏有矣!

2014年6月3日星期二

下屬違規上司管不得?



犯錯容易罰艱難
只緣高薪養清閒
行規制度皆不怕
獨怕無知變自殘

日前威記王爺醫館傳出有員工向傳媒投訴、遲到一分鐘就被上司落簿、並指有人玩針對。呢嗱、員工遲到呢家嘢點講都係犯規嘅、是否應刻受處分就要經過一番調查才可作決定。所謂家有家規、國有國法、規則既然被定下來就是要求人們遵守的。那麼、究竟這名遲到員工該不該受罰、恕在下無資格判斷。根據威記發言人解釋、在新制度之下、員工每月遲到五次才會收到提醒通知書、如果在六個月之內合共收到七封提醒通知書嘅話、即是說該員工已經遲到共三十五次之多、到時就會收到一個口頭警告。注於在甚麼時候或在何種情況下、員工才收到譴責就並無交待。