鬧慣成自然

地龍爆醜眾多嗲

大奅唔奢卻又奢

政治觸覺無須有

任憑你罵軟皮蛇

呢嗱、地龍造假工程越揭越臭。據田二少講、紅暗站被箭嘅鐵枝並唔係早前公布嘅十七枝、而可能係二千枝。嘩、阿哥、係真唔係呀？如果係嘅話、就真係𠹳撻撻喇！如果話呢單嘢唔係監管不力嘅話、就更加牙煙。因為有可能涉及其它「景轟」吖嘛！因此、在下一早就講過應該將呢單嘢交由廉記去查清查楚。冇事則算、有事揸正嚟刨吖嘛！現在交畀巡捕房做本無不妥、但感覺上總係有啲怪怪哋囉！

幸好呢單嘢係袋鼠公司經手、如果係由紅家公司經手就大件事咯。我敢寫包單、惹事堂班友肯定嘈到拆天、絕對唔會好似現在咁安靜嘅。嗱、仇內媚外大概就此可以見一斑喇啩！日前有報導指元乜區高架橋在一三年受隔籬打樁工程影響沉降二十毫米、直至一七年底才進行加固工程。地龍公司一直隱瞞此事、直至近日被傳媒踢爆、才以吱牙膏方式續啲料吱出來。嗱、乜乜朋比都唔在講、公家冇理由唔知呢單嘢嘅喎！點解硬係要被人挖穿晒、至肯企出嚟表示跟進架？須知到今時今日嘅罪惡城係政治格鬥之地、咪以為唔出聲就可以瞞天過海。政客博出位、必定會𢵌爆你嘅。請看看、地龍出事後、唔係每一單新料都係被外人踼爆嘅咩？唔係一單比一單更加得人驚嘅咩？公家總係後知後覺、吓吓被動兼被鬧。當下嘅管治威信唔係「一日過零」咁、喺度跌緊咩？點解經過咁多事、公家政治意識仲係咁薄弱？回想在「沙士」前嘅公僕是具有相當政治危機感的、從來都不會掉落政治陷阱裡面去。勢難想象「沙士」過後、公家唔係吓吓當炮灰、就係被人拉去墊屍底嘅。點解經歷過咁多次教訓、公家仍然係冇齣好戲？究竟係被人鬧慣成自然、抑或唔被人鬧餐懵嘅就唔過癮？在下聽聞講、公家日理萬機、就算老虎䁯嘅眼瞓都好平當嘅喎！但問題係、點解我從來未有在私營機構聽間過呢種言論？唔通你會認為李老闆會䁯眼瞓嘅咩？坦白講、小錯積積埋埋就會變成大錯、一經被踢爆後唔止全城鬧爆、仲會有好長手尾要跟。難道、有錯隱瞞、不被踢爆絕不跟進、係啱嘅？