虛偽世界

罵我是衰人

當你發牙痕

一心無二志

賺取世間銀

在一遍取締電子香煙聲中、阿一排眾而出、直指全面禁制電子香煙係不切實際嘅。之但係、當佢話口未完、韋着涼大夫就指出、電子香煙含有嘅不明毒素對人體可能構成嚴重傷害、並呼籲禁絕電子香煙及其配套產品。

我唔知阿一聽唔聽到韋着涼大夫嘅呼籲、但我只知到揸拂人極有可能睬佢都有味。最簡單嘅例子就係、那款對人構成騷擾、而且被街坊視為厭惡程度爆燈嘅電話廣告、都只係禁啲唔禁啲。原來理由係、如前揸拂人阿貪所講、電話廣告養活兩萬幾人嘅喎！咁即係話、有煩你哋班蟻民煩、別去找他麻煩吖嘛！現行嘅香煙封包上已經畫上吸煙者患癌嘅恐怖畫面、卻可以照賣無誤。咁即係話、公家已經作出警告、無論是吸煙者本人、抑或是吸到二手煙嘅其他人、即使患上了癌症亦唔關公家嘅事。嗱、咁搞法、分明係畀西瓜皮街坊踩。如果真係咁危險嘅東西、點解唔全面禁之？嗱、踢爆咗、無非係「利益」兩個字作怪。因為煙草是一門賺大錢、而且又係納重稅嘅生意嚟、無論是煙商和公家大賬房都賺個盤滿砵滿。煙草害人是一回事、但花碌碌嘅銀両「代代平安」又係另一回事。咁你話嘞、仲禁鬼禁馬咩、係嘛？！