居屋價瘋狂

升升又升升

食完兼夾拎

睇見眼矎矎

聽落冷冰冰

早前、公家提出一藍子（未來）降低居屋售價計劃、宣傳工夫亦做到足。之但係、當下居屋價卻突破萬元一呎大關。咁即係話、公家給予嘅係遠水、當前燒着嘅係近火。呢鋪算唔算係大隻講呢？講真、大多數街坊都渴望盡速改善眼前居住環境、根本上唔想聽廢話。由本城大歸開始、每屆阿頭 “啱僧除外” 都顯示極關心基層街坊住屋問題、既有老古董提出嘅八萬五、亦有阿狼所講嘅重中重、但廿年已過還是口惠而實不至。試問怎能叫街坊去相信公家？問心嗰句、在今時今日人均收入算來、有能力出資千多萬去買一層樓嘅人、根本上冇須要公家津則。但是居屋呎價也賣到萬多元、而最近有報導指出乜山花園（居屋）呎價接近一萬九千元、簡直係人都癲啦！係嘛？難怪咁多人話、家陣嘅居屋政策係為着要晾起物業價格而設架啦！

瞓醒未呀？

醫療咧咁𠾍

病人又賴嘢

賞罰欠分明

圍威好過借

呢嗱、罪惡城在兩個月之內連續發生兩宗嚴重醫療事故。早前聚兵門醫院一名年長男病人在沐浴期間被人以硬物插入肛門並弄穿大腸、並於數日後身亡。前兩日女皇醫院嘅醫療團隊、誤把陰道作肛門、將應該透過肛門注射入大腸嘅顯影劑錯誤地注射在陰道內、以致一名年長女病人無辜被切去輸卵管以補其命。嗱、前一單事件已經弔詭得令人百思不得其解、而後者則更加係形同集體被鬼揞眼般的驚人聽聞。喂喂、沖涼至喎、點解要用硬物插入病人肝門架？仲有呀、造顯影檢查既有放射治療師、有醫生、亦有醫護助理在場、點解無人發現插錯窿架？究竟班友仔瞓醒未架？

喪普變招

誰比誰更高

笑面裡藏刀

我搞圍威喂

你要眾為奴

喪普向紅家發動嘅貿易戰一開打、就發覺並不如想象中那麼好玩了！現在花家大豆和豬牛等肉類堆積如山、再係咁落去共禍黨必定在中期選舉躀低。喪普一方面大開庫門拿錢出來向農民補貼、另一方面又積極地找尋新買家來代替紅家。於是乎、喪普馬上以撇除所有貿易壁壘引誘歐盟落疊。歐盟反應十分積極、其委員會主席庸克嗱嗱聲撲到花家去見喪普、並得到喪普答應不增加歐盟汽車進入花家嘅關稅、但條件就係歐盟必須跟花家聯手打壓紅家。雖然雙方已經達成共識、但基於喪普有過兩次對紅家毀約嘅紀錄、莫講話歐盟成員唔敢相信狂人不會再次重蹈覆轍、甚至連花家內部都唔睇好今次花歐會面有任何成果的。

南亞點會有難民？

懶理難民不難民

總之有水便精神

既得莊家挨義氣

閂門隱事去搵銀

在 1975 年至 2007 年期間、罪惡城一直出錢和出力去供養着由安南來嘅難民。難民高峰期不少於 20 萬人。至今、聯合閣仍然欠下罪惡城在難民項目上墊支嘅 11 億 6千 2 百多萬元款項。

又關世界杯事？

貓尾掹得好

唱歌唔使譜

日日詐糊塗

人皆被當草

日前有街坊提出、應該由講錯電台出面去購買世界杯傳播權、然後分拆給各家視聽傳媒轉播、好讓全城街坊都可以跟全世界球迷一起共賞世界盛事。之但係、賬房大掌櫃劏房哥話、公家不適宜插手世界杯傳播權、因為咁樣做等同干預商業上嘅自由競爭喎！由比可見、今日嘅公家重商輕民嘅程度係遠超於昔日殖民地當局。難怪榕樹頭講古佬三叔公成日講、在殖民地時期、老番嘆牛扒、佢亦嘆牛骨、輪到架忌冷話事之後就連骨頭都冇得舐。嗱、按照殖民地時期「全民免費睇世界杯、大歸後馬上絕跡」看來、三叔公所言不差。難怪街坊對公家嘅態度冷若冰霜啦！咁亦難怪、家陣公家只須要小圈子支持便足夠、民心對他們來說是多餘的。搞成咁、真係要多得那群尊貴在垃圾會上演那套「掹貓尾」鬧劇。某人一聲等埋阿叔、結果便馬上倒流、由贏家變輸家、登時毀去全城街坊一人一票選大佬嘅權利。

蠢

盲丙扮晒醒

亂咁將人整

買板唔知埞

衰格夾難頂

江湖流傳、一名在椰樹省三每口市拍戲嘅禾日城女導演在酒店睡覺時、機乎被鄰房嘅一名飛機師學徒強姦。當女導演驚醒過來時發現有一名陌生男子對她有所動作、便猛力將他推開、然後揮動雙手猛打該男子、直至他退出其房間為止。事後女導演跑到三每口市派出所報案、但坐堂嘅值日衙差卻一味勸她和解！其間、有人警告她、若然堅持落案嘅話、她本人亦會被控以毆打他人罪。由於事主不懂當地法律、惟有離開派出所、然後返回禾日城、繼而在飛時卜上公開此事。嗱、當事情公開之後、很自然地在互聯網和輿論界牽起一陣嘩然。好嘞、當事情鬧大之後三每口市派出所通知女導演、沙嫌果子已經被捕、並要求事主前往派出所落口供。

卸膊

如此作事太草率

應藏秘密口中出

良心賤賣穿底價

有誰敢作爛頭卒

正當人人稱讚敢於去喐亨梗㒼族社嘅安全隊長是本城罕見嘅猛將時、那名向安全隊長提交禁止㒼族社活動報告嘅公人被評歌社起底、登時變成黃偽兵箭靶。喂、阿哥、打貪部都曉得以「密實、密實」來到確保提供資料者嘅人身安全。點解安全隊長會當眾揚人家嘅身份出來架？嗱、在翻看錄影帶時才發現、原來當日安全隊長公布考慮禁止㒼族社運作時爆響口、話明建議係由一名隸屬巡捕房嘅結社組助理提供的。對公家而言、類似舉動係前所未有過嘅。呢趟都可謂鑊鑊新鮮、鑊鑊甘咯！

無良與無良

胡亂發脾氣

養成嘴放屁

放大不安全

博亂搶人氣

某新屋邨被指食水含鉛量超標、並在社會上鬧得沸沸騰騰。如此這般、縣府無端端成為眾矢之的。事隔數天、房車部長陳火頁終於企出來將事實真想告知街坊。據講、經水記調查發現是有人曾經私底下更換水管和水龍頭、才出現所謂含鉛超標情況。經過水記化驗過嘅食水樣本、全部都是合乎本城和世界衛生標準的。在四個鉛水戶之中、有兩戶食水已被證實是安全的、但有一戶拒絕水記人員入內抽取食水樣本、亦有人以其它理由使得水記人員無法在其單位抽取食水樣本化驗。總言之、問題就像忽然之間同時消失了一樣。嗱、呢單嘢分明係有人自己捉蟲。點解有人打鑼打鼓般的把責任賴到講府頭上去的呢、吓？！

紅家輸硬？

造定隻門等你開

別以為我獨當災

三招過後才知痛

若要交鋒放馬來

 當今世上、只有龍族和花族同樣是經濟量超過 10 萬億花元嘅超級經濟体系、是歷史上絕無僅有。這場貿易戰是兩大家族爭霸嘅必然產物、誰也躲不了的。 2015 年喪普參選期間、聲明將會大幅度增加龍族產品關稅。 2017 年花家「家族安全戰略報告」已經將紅家列為戰略競爭對手。翌年花家「閣房安全報告」進一步確認紅家為對手、然後把龍族出產嘅太陽能產品加關稅 30% 、並將會在4年內續步降至 15% 。同年 3 月 1 日花家對龍族進口嘅鋼材和鋁材分別增加 25% 和 10% 關稅。由此看來、喪普是刻意的和有步驟的挑起這場貿易戰、其目的不止阻撓龍族經濟和科技發展、更多的就是搞垮紅家推行嘅新絲綢之路。雖然紅家已有充足準備去跟花家打這場貿易戰、但在喪普對龍族產品開刀時、江湖上出現不少喊紅家服軟嘅聲音。

反盟內訌？

笪鳴反豬肚

劍己冠叛徒

民主不民主

語石乃花奴

近日榕樹頭興起政客講古、其中較為吸引耳朵嘅兩名講古佬就係講術「銀紙行動」嘅前問協大佬鳳劍己、以及講術「病石與花銀」嘅病語石前助理丈笪嗚。兩個故事當中嘅關鍵性人物都是「龍種袋鼠族人」病語石。鳳劍己指病語石同妖蜓聯手迫他放棄參加上次垃圾會主辦嘅填氹擂台大賽、並讓個位出來給獨派代表妖重閹、否則就唱衰佢係㒼主派嘅千古罪人。鳳劍己話、有人主張與獨派聯手奪取垃圾會主導權、從而控制縣府施政。丈笪嗚則揭露他本人當病語石副手期間、得知病曾經收取花家兩個偽民間組織（N依啲和N啲唉）提供嘅花家銀両去做戰中前奏工夫、並且踢爆病是一個點人唔使本而又非常吝嗇嘅偽君子嚟。

打蚊行動

唔踢永唔逳

有蟲亦懶捉

工夫唔去做

有數搏命篤

近日縣府不斷吹風將會展開一項命名為「打蚊」嘅行動、去取締一個隸屬五獨教嘅小集團蚊族社、使得那群獨仔獨女有如面臨世界末日般的喴嘩鬼叫。此時眾痴頭目戇痴瘋立即跳出來同蚊族社劃清界線、免得被隻蚊陀衰喎！黃仔尊貴亦例牌用把口去替蚊族被抱打不平、指責縣府打壓異己和妨礙結社自由喎！嗱、其實由殖民地年代直至大歸後嘅今天、縣府都係打壓結社自由、而且從來沒有改變過。如果唔信嘅話、大可以去問問城中嘅社團兄弟、看看有那一個社唔係非法存在嘅。講真、今次縣府大概係賊佬試沙煲、隨手搵隻蚊出來際旗、下次分分搬埋把「狗頭閘」出來招呼眾痴都有可能架！所以我提醒戇痴瘋、勿以為做而不認就當朝廷唔知。

波斯有難

我要發大財

誰敢踩我台

拳頭打爆石

注定你當災

花家銀子黨大金主主要是從事文化影視產業、互聯網產業、電子科技產業、賺大錢嘅地方就亞洲、由其是神州大地、所以一向堅持將主力放在亞洲挾制紅家。今次銀子黨迫喪普反口同紅家打貿易戰、無非是想令到弄禍黨在中期選舉失票。由於弄禍黨金主是從事石油業的右軚人和軍火商、而利益所在就是中東、所以每當該黨掌權時、中東就會出現死人冧樓嘅事。當喪普上台後便宣布三聖城是意識劣首府、並將花家總代理也搬進去、登時搞到該區幾族人廝殺起來。喪普為着圓其石油出口第一大家族春秋大夢、除咗迫使全世界在十一月四日前停止購買波斯石油之外、並拉攏巴比倫、聚利罅、突劂嘅腐乳得族人聯同匿藏在波斯境內山區嘅腐乳得人一起發動內戰。所以話啫、甚麼民主、甚麼價值觀、甚麼人權全部都是用來騙傻仔的。請問中東人嘅人權究竟是被誰剝奪嘅呢、吓？

乞錢都有問題？

人家搏亂你挑剔

寸盡他人食夾攊

採訪變成大偵破

斷人衣食己無益

 

江湖傳聞、丐幫行乞期間假扮流料波嘅孝子、擺人家幅車頭相出來騙街坊善心。當記者找到十一袋長老常無查詢時、得到嘅答覆係「丐幫從未講過為流料波籌錢」嘅喎！記者話、街坊一直以為丐幫為流料波嘅遺孀流蝦籌措水腳助她往外地去、仲問常無對此有咩補充。常無反駁、流蝦已經被番邦包起咗啦、還有個屁必要在乞兒砵頭𢲡飯食咩！正當記者繼續追問點解要利用流料波張相來行乞時、忽然之間有個丐幫弟子跳出來話、佢哋丐幫非常之仰慕流料大俠、故此封咗佢做乞兒界嘅精神領袖、咁唔得嘅咩？記者登時口啞啞望着常無、而常無就眼矎矎咁瞪着頭頂上的一片天。

此峰不同彼峰

阿峰搵食靠偷雞
有錢唔拎咪使嚟
執起關刀糞裡攪
冚城熏臭犯天威

近日江湖上流傳、埔桔翻艇海難事件當中出現一位年僅三十歲的救人英雄。他是一位內地人、名字叫張皓峰、在海難事件之中讓出救生艇給被他救起的人、而自己就在海上飄浮。雖然他救活了四人、但視作為小事一宗、而且婉拒公司給他十萬元獎金。當我對這位峰哥敬佩不已之際、腦海中忽然也出現另一位峰哥。兩者雖然同叫阿峰、但此峰不同彼峰。講起這位本地峰哥就駕勢喇！佢最鍾意就係向人攞錢。早前佢人稟向巡捕房一哥索償「捕快用手扣搭佢上警車」嘅孖葉費失敗之後、又入稟向監房一哥索償「要佢碌光豬踎地聽監頭訓話」嘅光豬費一萬六千両銀。嗱、攞唔攞到錢暫時未有分曉、但戇痴峰嘅大號又可上頭條喇！免費賣廣告、無笨有精吖嘛！

沒禮貌的客人

當年批我人莽撞

今天遇上喪普狂

地位高低無久遠

惟將被貶當韜光

當年總舵主夫婦攜同千億大單不計千里迢迢到訪英吉裂、居然被事頭婆在背後與其助手形容為粗魯客人。你話嘞、咁嘅待客態度係幾咁卑劣呢？嗱、呢個世界真係有報應架！就在尋日之嘛、花家大佬喪普夫婦到事頭婆家中作客、卻被英吉裂傳媒批評為莽夫。件事係咁嘅、第一、喪普遲到令到一把年紀嘅事頭婆在門口乾企十二分鐘。第二、喪普行近事頭婆時利用其妻梅拉利亞做「卡窿」將自己與主人家隔開、連鞠躬都禮都冇行。第三、在檢閱易腍軍時走在事頭婆前頭、以自己龐大身軀遮住細細粒嘅事頭婆、搞到主客難分。第四、與梅菜山相閣見面時即彈「軟脫歐」計劃係鬼祟冇膽嘅做法、暗喻梅菜山係廢柴。之但係、今次我要撐喪普。

感激喪普？

見穴不打穴

荒唐且劣拙

講到似層層

信否無分別

剛剛聽聞、喪普企圖迫使世貿組織向紅家開刀。消息顯示、目前除咗花家之外、還有楓葉、架仔、歐㒼聯手向世貿施壓、大有非把紅家踢出該組織不可之勢。由此可見、七大工業家族（下稱 G7 ）成員一致對紅家作全面性打壓、係唔關貿易平衡嘅事、而係以打垮龍族高速發展中嘅科技為己任。首當其衝的就是被 G7 視為洪水猛獸嘅龍的 5G 先進技術。因為若讓紅家率先推出 5G 嘅話、紅家就會成為全球十大先進科技（包括人功智能、無人駕駛導航、機戒人等）嘅大龍頭、到時 G7 就淪為塘邊鶴了！因此、呢場並唔止係貿易戰咁簡單、直和係 G7 跟紅家嘅一場全球爭霸戰嚟。

灰熊京的話

一言勝萬千

聽後更心酸

心知無善策

冷淡過幾年

日前沙俄大佬灰熊京向紅家講出一番金石良言。灰熊京指出、如果把人民嘅居住權、健康權、以及受教育權拿去推動經濟嘅話、咁樣嘅政府是一個無良政府。國家不能變成弱肉強食嘅世界、有人擁有大把樓、有人冇樓住、如果搞成咁、管治者應該下台。因為民生問題就是政治問題、這是管治者責任。嗱、咪以為灰熊京空口講白話、沙俄公民人均擁有十八平方米免費居住範圍、即使超過限額收費也很便宜。日常生活用水、包括自來水和熱水等都是免費的。有病睇醫生只須繳交藥費、其它如住院、治療、造手術等、全部免費。教育方面、免學費、教科書由學樣無常提供、校方還向學生提供免費午餐。勞工方面、法律規定任何機構若要大量裁員、必須要在解顧協議前三十日向國家就業局申報、獲批准後才可實行。嗱、呢啲咪係以民為本囉！

老點世界

唔怕算不清

最忌詐錯型

吹水嘴唔抹

誤導世間情

剛剛聽聞已故反紅名人流料波之妻流蝦（以出外求醫為理由獲批准出外就醫）被放逐到番幫去、內地就有學者飛撲出來指、今次放逐流蝦係紅家拉攏歐㒼一起對付花大叔嘅負帶修件嚟喎！嗱、總之紅家每一次放逐離心分子時、都會出現這種講法。但問題係、流蝦何德何能可以令歐㒼為咗佢而改變政策跟紅家聯手付其盟主？別忘記、歐㒼跟花大叔鬧嘅只不過是圍內風波、但係紅家跟花家翻起嘅係關乎兩個家族未來興衰嘅一場大決鬥嚟。試問歐㒼又怎可為一個流蝦而跟黃面佬對付同種嘅白面佬架？何況歐㒼早就發表聲明他們跟花大叔之鬥、與紅花兩家之爭係冇關連嘅。即係一早就劃清界線、紅家亦早就收到。因此個別歐盟成員跟紅家溝通並不代表聯盟、更多的應該係擴大雙邊貿易以減輕貿易戰帶來嘅負面影響而矣！

如此預言家

吹水唔抹嘴

胡言兼亂𢵌

老點少年人

話後去收水

前晚在榕樹頭講壇聽銷預言評論阿紅跟阿花嘅擂台戰前恩後果。據銷預言估計決定呢場仗嘅勝負不止在於人強、更多嘅係誰的兵器殺傷力更大。銷預言話、阿花手持嘅兵器係一柄大關刀、而阿紅拿嘅係一枚木棍、顯而易見係大關刀殺傷力大得多。銷預言話、阿紅雖然睇落孔武冇力、但只係裝出來嚇人的。而然、阿花身懷嘅絕技才是真才實學。除非阿花手下留情、否則阿紅必死無疑。銷預言解釋、當年阿花為着借助阿紅之力去牽制阿蘇、便將阿紅從貧民窟拉到富庶世界裡面去。阿花希望阿紅得到好處之後就會心懷感激、從此以花家為榜樣重新做個好人。殊不知阿紅發達之後唔止自恃財雄勢大欺壓街坊鄰里、仲要搞民族復興。銷預言忽然滿面陰氣地問、如果英吉劣、得乳豬、西崩牙、盤桃牙、耳帶脷、架仔等、個個前侵略者嘅家族都搞復興、這個世界還得了嗎？就係咁、阿花才被迫出手去教訓阿紅喎！

越隱越難隱

地龍賴嘢爆奇觀

則頭擰頸繼續瞞

街坊有如豬仔賣

車前蹆後也一般

空堪地龍站「斷筋」事件越來越詭秘、並引發更多問題。問題一、點解車房部長拒絕接收二判提供嘅有關涉嫌造假罪證、反而喊他直接去巡捕房或打虎部舉報？問題二、點解馬路部轉介往巡捕房嘅資料裡面、並沒有包含二判聲稱嘅有關技術問題和修補建議？問題三、點解二判堅持要巡捕房先立案、然後才肯交出有關證據？問題四、點解尊貴明知請唔逳大判出席議事堂接受查詢、仍然要多此一舉？嗱、以上嘅情況皆令人有所聯想。難道江湖上盛傳、大判涉及嘅大型基建項目之多、以及款項之巨、大到連講府都不敢喐佢係真嘅？

打到來了

勢洶勢又狼

窮燶便發狂

鐵拳講道理

理敗也稱王

花旗連續兩次與波斯境內反對派合作推翻攞蝦尼政權但失敗告終、使得喪普惱羞成怒而宣布退出波核協定、並聲稱將會恢復對波斯嘅經濟制裁。喪普下令英桔劣、法攔犀、德乳豬等盟友撒出在波斯嘅投資、並發出警告任何國家膽敢在十一月四日之後再構買波斯石油就會受到花旗製裁。這亦係意味着、一係天朝棄波斯而構買花旗石油、一係就繼續構買波斯石油而遭花旗制裁。喪普呢兜㕲嘴都可謂又惡死又毒辣咯！

為反對而反對？

有真亦有假

道理靠吹打

事實勝千言

無須多廢話

前任冧巴溫阿狼在任時、曾向惹事堂提交設立創科局議案、卻遭遇到反派瘋狂反對。當時社會上有人質疑、創科是為年輕一代開拓多一條生路有何不好、點解反派硬着要反對得那麼厲害？有人話、反派係反慣成自然。嗱、據榕樹頭講古佬眨眼陳講、件事係另有隱情嘅。眨眼陣話、前朝娛業組之所以經常阻頭阻勢、係害怕創科項目一旦興旺起來就會益咗「隔籬」喎！當時我只當那些話係耳邊風、但如今諗翻轉頭又唔似係吹水嘅。只要看看花大叔點樣迫紅家放棄「龍的製造2025」計畫、就足以證明真係有好多人要阻止龍族復興嘅。

多講嫌譖

太爺飄飄然

失覺發狂言

被人搊後腳

補鑊破曉前

想當年、縣太爺尚未係縣大爺嗰陣時曾經講過、官到無求膽自粗。今日當上了縣太爺、雖然不曾宣之於口、卻以一句「每次見寸媒時、都要先唐後番雙語回答同一問題、簡直係麻煩兼譖氣」來展示佢仍然是膽粗過人的。殊不知、收料人協會嘅發言人忽然飛撲出嚟、兜口咬實縣太爺唔放、並質問佢在衙門當差經年、點解唔知到老番報料社係須要番話紀綠片去發放新聞嘅咩？幸好、咱家縣大爺乃屬天才兒童、漏夜發文認衰、嗱嗱聲將事件降溫。如果唔係嘅話、真係有排被人插架！

得寸進尺

為求開局好

忍讓退一步

落得不同理

遲早上絕路

幾日前、齋講大教館教頭尋㒼掹話、為着迎合社會上嘅須要、人們有權要求講府修改歸本法、給予講獨一個合法嘅地位。尋㒼掹嘅講法、分明係針對着朝廷而叫囂。嗱、佢之所以夠膽成咁、唔係佢英雄不怕死、而係明知死唔去。因為到目前為止、仍然沒有相關法例可以制裁佢吖嘛！否則、畀個天佢做膽都唔敢亂噏廿四。講真、自從呢班講獨教頭知到縣太爺不打算立法廿三兜之後、個個都變得膽生毛。今次嘅叫囂純屬牛刀小試、日後仲有大把好戲上演。大家不防擔定凳仔、霸個頭位、等戲睇啦！

暗獨

政棍無良又一章

仇宗恨祖刎天良

為作洋奴腰亦折

生娘背後刺一槍

在下早就講過、花旗為着迫使天朝放棄龍的製造2025（放棄龍族復興）便加強以經濟、軍事、政治三方面力度來打壓天朝、而講獨必定會加以配合的。呢嗱、風水佬呃你十年八年、而我講嘅話就真珠都冇咁真咯。日前、暗獨三人組（涼茶杰、瞓街姐、菜撬窗）飛往抬島出席當地獨派論壇唱衰罪惡城。內容是環繞着「歪曲河井兩制、捏造政治打壓事件、將刑事罪犯講成係政治犯」之類嘅話題亂噏廿四。現在有兩個問題、第一、三人組咁做、是為罪惡城爭取民主、抑或係以特區公民身份、跑到抬島現身說法抹黑河井兩制和中央呢？第二、三人組點解要咁做、奉誰的命令而做呢？你無須回答我、只要自己想一想就可以了！

唔講遊行

平生惰慣懶開齋

坐墊藏針也局挨

橫掂欠人千千萬

話你唔聽布又拉

古語有云「工欲善其事、必先利其器」吖嘛！即係話一個工匠要把工作做好、必須要俱備一套鋒利嘅工具。換個角度來講、要治理好一個地方、必須要有完善嘅法律體制。要確保一個國家安全、必須要在法律例出條款讓法官在判安時有所依據。否則、就會變成和尚打傘、無髮（法）無天、冇可能做到長治久安的。之不過、咱家縣太爺就係唔信這一套。佢老人家出席大歸慶典嘅派對時又再一次強調、目前尚未係將安全法立法嘅好時機喎！難道縣太爺認為單憑其個人魅力就可以平息禍亂乎？