小心踩氹

頻頻食詐餬

斷估冇辛苦

財來當直受

用家變羊牯

近日「鯊舂鱔」紅館區車站蠱惑工程熱爆全城。起初有關方面故左右而言它、企圖將件十大化小、小化無。後來驚動議事堂、地龍公司高層聲稱、係分判商范信嘅工人剪短鐵枝。但到咗第二日又爆出、原來早在去年另一分判商鍾蚪已經飛鴿傳書通知混防部「鯊舂鱔」紅館區車站工程不靠譜。據講、當時分判商鍾蚪一面通知混防部跟進、另一面又與總承辨商鱧遁會面尋救解決方法。之後件事就不了了之。直到近日工程問題曝光、分判商鍾蚪懷疑鱧遁可能並無跟進問題。

嗱、前日看見阿邊個尊貴對住公仔箱講、有理由相信出事鐵枝並唔係由范信嘅工人剪短的。事情發展到呢個地步、這宗個案擺到明係涉及隱瞞和造假、直程係刑事罪行嚟。但係班政客只係七嘴八舌嘮嘮叻叻、而唔係如往常習慣一樣跑去廉記報案。仲有呀、此事關乎大眾安全利益架！點解揸拂人一直就手旁觀、直到今時今日全城鬧爆才宣布召開調查委員人跟進？現在眼前見得到嘅就係鐵枝被剪短、究竟還有沒有其它不為人知嘅造假工序、大概只有天曉得。你認為單靠一個甚麼調查委員會、就能夠有所作為嗎？起碼我唔信囉！早幾日、有條地龍公司高層瞀里跳出來牙斬斬咁話、由地龍公司續個工程咁去監察嘅話、係唔實在嘅講法嚟喎！佢咁講、大概係認為判咗出去嘅工程、地龍就可以關人隱事。喂、阿哥、就算執到寶、都要睇吓堅定流嘅、係嘛？閣下咁講嘢法、分明係斷估冇辛苦。現在賴咗嘢喇、地龍公司係咪冇責任架？嗱、連高層人土嘅工作態度都係惡劣成咁、試問下面班友又焉能提供高質素服務來呢？嗚呼哀哉！