利民政策出台

遲來勝不來

樂見有花開

看誰福份厚

好話夾唔該

講府稍後就會公布三項幫助街坊獲得片瓦遮頭嘅措施。其中包括：徵收吉樓稅；在拍賣表抽出部份土地興建公營樓；居樓價格與樓市脫鉤。嗱、聽起來的確唔錯。因為徵收一手吉樓稅嘅目的、係防止有人囤積居奇。在拍賣表抽出地皮建公屋、目的是堵塞有地賣冇地建公屋嘅漏洞。居屋售價與樓市脫鉤、是保證能夠直接幫助到中下層嘅市民所須。之但係、這些措施都是過氣縣令阿貪在多年前就已經提出過、只係有頭威冇尾陣而矣！今次縣大爺冧井重拾阿貪三絕招、大有呼應內地打擊炒樓活動之勢。只不過、今次會否再次受到乜乜霸權打壓而投降告終、那就要睇過至知了！

呢嗱、我唔係潑冷水、一個由乜乜霸權扶上位嘅話事人、是否有勇氣去挑戰造王者嘅既得利益確實成疑。先拿吉樓稅來打個比喻、如果只是以加差餉作為阻嚇、似乎係姿勢大於實際。所謂從賣地表抽出官地建公營樓、亦有商榷餘地。因為在甚麼地方抽出地皮、抽出來嘅幅度係幾多個巴仙都大有考究的。比喻在山卡啦地區抽出地皮建一個屋邨、為後來嘅私廈當開荒牛、基本上是講府一慣嘅做法嚟。講到居屋跟樓市脫鉤呢家嘢、就必須先搞清楚目前讓居屋在地產市場自由賣買、是否已經違背讓基層居民人人有屋住嘅宗旨。居屋是受到政府補貼的、根本上不適宜放在樓市買賣、而過往之所以放寬、恐怕是有人要為私廈晾價而矣！其實一切都係事在人為、做任何事都有正反兩面、無論是好還是醜都須要視乎執行者是否用心良善而定。但願講人是有福的！