軟性過招

呢條瞀里確不該

大奅狂車扮嘢來

跟紅頂白成真理

道理唔道播禍災

綽號癲狗嘅花旗國防部長馬蹄絲於本月26至28日訪問天朝、據說是來交流戰略意見喎！嗱、講起來、心水清嘅街坊會奇怪、點解只有聽聞花旗軍頭訪問天朝、而沒有天朝軍頭到花旗訪問嘅消息。其實道理很簡單、因為花旗一向「恰」慣人、但又怕唔覺意玩大咗而遭反撲、所以每到咁上下就派個軍頭到人家屋企打圓場、另外又派遣戰艦和戰機在人家嘅家門口也文也武、企圖嚇窒對手吖嘛！呢啲咪就係「又要威、又要帶頭盔」囉！其實馬蹄絲今次係另有一個更重要嘅任務嘅。那就是睇睇天朝會唔會履行跟波斯簽署嘅軍事聯防協議、好讓花旗決家是否攻打波斯之前有個預算。

利民政策出台

遲來勝不來

樂見有花開

看誰福份厚

好話夾唔該

講府稍後就會公布三項幫助街坊獲得片瓦遮頭嘅措施。其中包括：徵收吉樓稅；在拍賣表抽出部份土地興建公營樓；居樓價格與樓市脫鉤。嗱、聽起來的確唔錯。因為徵收一手吉樓稅嘅目的、係防止有人囤積居奇。在拍賣表抽出地皮建公屋、目的是堵塞有地賣冇地建公屋嘅漏洞。居屋售價與樓市脫鉤、是保證能夠直接幫助到中下層嘅市民所須。之但係、這些措施都是過氣縣令阿貪在多年前就已經提出過、只係有頭威冇尾陣而矣！今次縣大爺冧井重拾阿貪三絕招、大有呼應內地打擊炒樓活動之勢。只不過、今次會否再次受到乜乜霸權打壓而投降告終、那就要睇過至知了！

獨風繼續吹

冇法不立法

難甩戰鬥格

本末既不存

城中多邋遢

正當國歌法擺上議事桌之際、幾名眾痴黨黨徒戴上怪獸頭套在地龍車廂內惡搞國歌、並用手機拍下之後擺埋上互聯綱以作宣傳。有人認為地龍公司有責任去跟進呢單違反地龍規例嘅活動。但我覺得咁做猶如「急色男遇上石女」多此一舉。試問、誰認得出那些隱藏在怪獸頭套裡的眾癡黨徒是誰？何況仲係賊過興兵？簡直係勞民傷財啦！嗱、在亂制派方面、當然有人企出嚟對眾痴指責一番。係呀、眾痴黨唔止要侮辱龍之國歌、還要侮辱龍之國民架！家陣佢哋班港毒唔承認自已係龍國公民、搞衰你咪搞衰你囉！你哋吹乒乓咩？即使立咗國歌法、最多咪唔侮辱國歌、改為侮辱龍國囉！咁、你哋又吹得佢哋賬咩？唔啱又立埋國體法吖、笨！

塑造好形象

讚美由來未必真

唯獨康莊任爾行

一輪變幻添矜貴

集體離地看繽紛

近日縣太爺上京面聖、拜會過七王爺罕靖之後便面見萬歲爺、並獲得萬歲爺稱讚了一句「罪惡城經濟發展是歷年之最強勁」之後、講古佬阿藍便馬開壇講古、佢話縣太爺只須一年光景就將這個本來烏煙瘴氣嘅罪惡城打理得立立令、並將朝廷撥款給罪惡城推行嘅（創科）項目都歸功於縣太爺。阿藍話「城中互片少咗而和諧多咗、妥協多咗、凝聚力和團結都就更多。衝破經濟單一化、讓新興產業落地開花、為經貿帶來更大發展空間。修補撕裂全憑大解、形勢改善勝在包容。」嗱、古仔就係咁聽、實際情況係點嘅、大家都應該感受得到的。

鬧慣成自然

地龍爆醜眾多嗲

大奅唔奢卻又奢

政治觸覺無須有

任憑你罵軟皮蛇

呢嗱、地龍造假工程越揭越臭。據田二少講、紅暗站被箭嘅鐵枝並唔係早前公布嘅十七枝、而可能係二千枝。嘩、阿哥、係真唔係呀？如果係嘅話、就真係𠹳撻撻喇！如果話呢單嘢唔係監管不力嘅話、就更加牙煙。因為有可能涉及其它「景轟」吖嘛！因此、在下一早就講過應該將呢單嘢交由廉記去查清查楚。冇事則算、有事揸正嚟刨吖嘛！現在交畀巡捕房做本無不妥、但感覺上總係有啲怪怪哋囉！

問你點頂？

揼雞不是要偷雞

就算神仙亦痴迷

拎起關刀發晒抖

未曾展翅便𨂐低

近日城中熱話就係、戒律長涉嫌作出選擇性檢控而惹怒了六判爺。事緣戒律長為着要煮死一名聲稱不知到有人利用其錢莊洗黑錢嘅錢莊東主、便放生一名涉嫌洗黑錢嘅阿乜姐和兩名已經在口供紙上承認有份參與洗黑錢活動嘅錢莊職員、而遭六判爺猛批評、認者不告、不認者告、畀佢玩晒喎！嗱、霎眼睇嚟、有人玩坦白從寬、抗拒從嚴遊戲、話做就做、話放就放。如果我係六判爺、見到咁情形都分唔出究竟邊個至係判官、確係唔嬲就瓦燒啦！在此之前、戒律長同樣講一聲「唔夠料告」就將所有涉嫌收受黑金嘅黃派疑犯集體放生、你話因乜解究？難怪班街坊質疑、巡捕房拉人、戒律院放人、還要用六判堂來做啥？

喪人喪招

政壇多博奕

㒼塞聽仆直

蛤乸隨街跳

看誰終得食

在與紅家打貿戰方面而言、喪普三番四次出爾反爾、使得全世界都見到花家信用無存。嗱、世人只知到罵喪普毫無信用、同佢協議直程係與虎謀皮。但實情又係唔係咁嘅呢？據榕樹頭講古佬三叔公講、喪普係特登咁做嘅喎！原因部份共磨黨員與對手民指黨聯手迫佢做哀人、而自己就在後面做好人搲着數。嗱、花家以脅迫手段四圍踢索只屬家常便飯、閣會要求喪普按照家規做事並無不妥。之但係、班友要喪普迫使紅家取消「龍的製造2025」計畫、等同迫紅家跟花家打貿易戰。只要貿易戰一打、喪普就立刻成為商家佬箭靶、共磨黨亦可能被迫妥協將他趕下台。

只有更醜

人在心不在

嘆句無可奈

大勢不由人

其心當向外

呢嗱、地龍工程越爆越樣衰、剛剛又聽聞話、有人將兩幅地窿力牆調轉來安裝。地龍公司知到後便要求承辦商立即改正、而承辦商亦答應立即答應。之但係、承辦商沒非將力牆拆卸重建、而係額外增加鑲板加固了事。令人吃驚嘅就係樓房部大老爺居然同意加固工程、並向伸請人示意重新提交新圖則就可以。嘩、阿哥、咁都得？喂、你哋知唔知到地窿冧牆分分鐘會將成條地龍生葬架！點解罪惡城嘅基建工程價錢往往比人高、但質素卻比別人低劣嘅呢？難道紫荊人非做冤大頭不可嘅？勢難想象、罪惡城自從大歸之後、政治亂七八糟、民生唔三唔四、現在連大型基建嘅醜聞亦越揭越臭。喂、當家的、究竟你哋知唔知到自己嘅責任架？點解會將好好的一顆東方之珠、搞成東方之豬架、吓？！

罪惡城點算？

花家殺到來

切勿再痴呆

慎防妖孽喪

有備免生災

近日坊間正在流行着「喪普發動對紅家嘅貿易戰已經進人實牙實齒嘅階段、罪惡城難免會受株連、到底我們應該如何自處」嘅熱話。吓、點解又關罪惡城事？唓、咪就係罪惡城是中土一部份囉！但有人話、花家給予罪惡城特殊地位嘅喎！嗱、話雖然係咁講、但花大叔反口覆舌已成常態、只有那群滿腦了黃色嘅懵仔才會相信架咋！何況、現在講緊嘅係花家利益呢？別忘記、喪普一上台就講到明天下皆不着、惟有花家着嘅。為咗花家先着、話之全世界都躀低晒啦！在咁嘅情形下、區區罪惡城算係個屁嚟咩？吓、唔信。那就擘大雙眼、慢慢去睇清楚啲花大叔點樣糟質本城、就知到我冇呃你架喇！

虛偽世界

罵我是衰人

當你發牙痕

一心無二志

賺取世間銀

在一遍取締電子香煙聲中、阿一排眾而出、直指全面禁制電子香煙係不切實際嘅。之但係、當佢話口未完、韋着涼大夫就指出、電子香煙含有嘅不明毒素對人體可能構成嚴重傷害、並呼籲禁絕電子香煙及其配套產品。

總公司的無奈

不動還須動

無須再耍弄

雜毛今遠去

裡外更加凶

話說、自從前事頭婆代理人執包袱返祖家刨薯仔皮之後、唐人城檔攤便交由唐人自已來打骰。點不知原歷屆阿頭來嚿嚿都係四方木、被城中大戶踢一踢就逳一逳、偏偏就只有總公司踢佢哋唔逳。究竟點解大戶咁巴閉、連總公司拍馬都追唔上、難道佢哋屁股有牙不成？無它的、勝在靠山夠大吖嘛！因為總公司稍為多聲氣、前事頭婆和花大叔就會跳出來指責總公司破壞「一家公司、兩個系統」嘅規定。這招以前真係好靈、總公司抗議總係無效架！由其是當話事人將一切事情都攬晒上身、總公司就連屁都放不出來。問你點頂？

信的疑惑

信與不信也是信

若非行家請勿進

進門通往監房地

一字言之就是蠢

昨晚在榕樹頭聽三叔公講、涼爽奇之所以搞到身陷牢籠、無非在於一個「信」字。三叔公解釋、涼爽奇「信」罪惡城是可以透過他們的意願而獨立的。這個訊息是他在大教館學習時被反紅教頭扤入腦子裡面的。日子久了、便成為思維嘅一部份、想搣都搣唔甩、這就是洗腦吖嘛！當下嘅獨仔獨女大多數嘅情況都是這樣、一切歸功於大教館喎！由其是、當涼爽奇眼見揸拂堂對於戰中班搞手連碰都不敢碰、就更加放心去闖禍、否則怒火開年（怒開）亦不會狼胎到那個地步。三叔公還說、如果沒有揸拂堂包容、全城大教館戰線統一絕對冇咁容易。

貿戰開打

乍看似牛不是牛

公然發難博倒流

牛高馬大鬼都怕

欺人以刃勢堪憂

喪普體跟肥恩簽定四項空泛協議之後馬上轉過頭來向紅家反口、並向五百億元紅家入口貨品徵收25%關稅。有人話、喪普呢頭跟肥因講掂數、嗰頭就跟為「喪肥會」穿針引線嘅紅家翻臉、正式係過橋抽板嘅卑鄙小人。嗱、我唔係黑心、以喪普嘅為人來說、會見肥恩無非是為花家中期選舉造勢、當大局定下來就會反口嘅。莫講話花軍撤離東北亞係老點街坊、即使那裡稍為太平都不符合花家利益。其實很多街坊都看得出、喪普跟肥恩簽嘅所謂協議只係四個毫無內容嘅框框、一切有待日後商量。嗱、既然要商量就有機會反枱。你估花家中期選舉過後喪普會唔會反枱？無論條數點計、都計唔出點解喪普會如此遷就肥恩。因此、我相信這次喪肥會只係喪普定下來嘅借艇割禾之計嚟。

速站時代來了

反派愛嘰趷

講府眼凸凸

議案慢打鑼

終歸要落實

一站兩份在一遍喧鬧聲之中三讀通過、速龍時代即將來臨。反派政客雖然百般刁難、奈何實力太過懸殊、結果議案還是通過。會後當車屋部部長阿煩準備向記者交代時、一眾反派尊貴輪流走到他的面前大喝可恥然後離去。講起嚟、反派惱羞成怒一啲都唔出奇。試問、佢哋除咗發爛渣、仲可以點？

貓哭老鼠

臥龍弔慰假惺惺

黃思喪心弄虛情

政治古今同一樣

一人勝利眾輸清

半文錢大佬涼爽奇暴動罪城被判監禁六年、一眾獨派頭目盲巫凈、蘿半蔥等人均表現得欲哭無淚咁款、委實肉麻到痺。人家涼爽奇在街頭與捕快搏老命時、嗰兩壇嘢只係安坐家中透過電視機睇戲咁睇、點解唔見佢哋落場幫拖？現在涼爽奇斷正入冊、佢哋就貓哭老鼠、簡直係弱智嘅。還有其它黃黨文膽、亦紛紛在不同平台上發表歌頌暴徒嘅文章。其中有一個叫越亂越憎嘅大叔、竟然將慢得拉（南非人的國爸）這位和平主義者、拉到去跟從事暴力鬥爭嘅涼爽奇相提並論、委實太可恥。

好戲剛剛開始

相見未嫌晚

合作也不難

各持一把秤

計較亦等閒

喪普終於跟肥恩在獅城見面。喪普於會後連講三聲非常好。之但係、是否真係咁好、就要看日後跟進如何。其實、無論是喪普對肥恩、抑或肥恩對喪普都是皮笑肉不笑。他們之所以見面、無非各有所須。喪普要的是一項成就和爭取花民支持而達至連任。肥恩要的是國際生存空間和取得北寒經濟發展機會。今次雙方簽署嘅協議只屬大方向、既無時間表、亦唔見細則、到不如說是意願書更加貼題。

小心踩氹

頻頻食詐餬

斷估冇辛苦

財來當直受

用家變羊牯

近日「鯊舂鱔」紅館區車站蠱惑工程熱爆全城。起初有關方面故左右而言它、企圖將件十大化小、小化無。後來驚動議事堂、地龍公司高層聲稱、係分判商范信嘅工人剪短鐵枝。但到咗第二日又爆出、原來早在去年另一分判商鍾蚪已經飛鴿傳書通知混防部「鯊舂鱔」紅館區車站工程不靠譜。據講、當時分判商鍾蚪一面通知混防部跟進、另一面又與總承辨商鱧遁會面尋救解決方法。之後件事就不了了之。直到近日工程問題曝光、分判商鍾蚪懷疑鱧遁可能並無跟進問題。

涼爽奇入冊

你反我又反

唯他撞正板

精人口擘擘

笨仔變監犯

怒火開年主角涼爽奇今日被判處六年徒刑、其餘兩名共犯驢見聞和戇卡駒分別被判監七年和三年半。大老爺判案時指出、嗰單畸屎橫睇、掂睇、點睇都係有預謀嘅一場暴動、所以必須重判。嗱、大老爺就講個啱喇、無論涼爽奇以甚麼「遺髮達意」又好、或有甚麼「鬚糕理想」都好、總之暴亂就是暴亂、絕不容狡辨的。嗱、由此可見那些甚麼「不守戒、不等如破戒」、以及「坐過監後嘅人生將會更美好」等鬼話、簡直黑心到痺、亦只有那些從少就被洗壞咗個腦嘅人才會聽信的。

潛龍勿用

台海起風雲

開打會死人

最怕唔知埞

帶眼睇路行

最近聽聞阿邊個台灣軍事專家講、他們的反導能力堪比以色列、仲話解放軍導彈來一枚打一枚、所以驚都未驚過。佢哋仲話、大陸航母膽敢駛入台海便有去冇回。嗱、呢啲所謂專家、基本上係行內人講行外話。假如解放軍用來攻擊台島嘅係廉價而又火力猛嘅長程火箭彈而非導彈嘅話、那麼台軍還用不用導彈去攔截？當幾千枚反導彈用完、大陸導彈才到又當如何？也許、台軍可以用近防密集炮火系統去對付那些火箭就可以了！之但係、街坊軍攻擊之前、必定會以電戰機干擾台軍電腦、或以脈衝炸彈將台軍嘅雷達和火控系統全部癱瘓、然後再作攻擊的。點解那些專家硬係唔提這些？

㒼塞

人㒼自閉塞

喪心夾冒失

勢殘想博亂

死後無屍骨

近日、台島菜一姐英子似乎受到花家為台島制定嘅「1. 台島旅行法；2. 閣房受權法；3. 亞周保證倡議法；4. 台島閣房評估委員會法；5. 台島各製參與法。」五大法案嘅刺激、結果借用智庫之口放話、將大平島租給花軍作為牽制街坊軍在南海活動嘅基地。如果係咁、那就悟會大了！喪普上場一年半就連環推出五大法案、針對嘅對象並非菜英子、而係大財神閘王。其實大家都知到、喪普嘅爛笪作風比蠱惑仔有過之而無不及。佢唔止反口覆舌、而且仲係點人唔使本嗰隻。例如喪普派遺副閣務卿前住台島對菜英子講、會為島軍製造潛艇、就已經係天方夜談。因為花家根本上沒有製造常規潛艇嘅機構和設備、而其它家族又不願意為此而跟紅家結仇。但菜英子偏偏妄相將自己係棋子嘅身份變成棋手。你認為喪普會答應嗎？

不願做木偶？

皇親欲扯線

知縣不咬絃

寧交眼中釘

拒上賊公船

昨晚在榕樹頭聽講古佬雙番東講、縣令林大孖與班親王「特別是文親王和恭親王」不咬絃、已經由枱底鬧到上枱面。據某位親兵講、林大孖出席白鴿會江湖壽宴期間、為着討好坐館爺白鴿韋而一擇萬金買一張白鴿標、卻冷待班親王。更甚者、就係林大孖心腹衛生部長岑笑痴眼高於頂目中無人、派遣其副手崔得意向到訪嘅親王府代表講、任何事都可以在正式會議時擺上枱面講、不必私底下傾喎！咁樣一講、氣得班親王眼凸兼氣窒、登時谷滿一肚子氣。

向上流

上流定倒流

聽者皺眉頭

龍游淺水氹

勢弱惹人憂

日前某公會組織公開呼籲、希望各界給予年輕人向上流機會、而且提出一系列計劃供有關方面參考。嗱、在下不是要潑冷水、而係見不到本城有啥條件可以令到年輕一代向上流。由八十年代下半期開始、城中工業陸續北移、本地工人大量湧入服務行業、並造成僧多粥少局面、以致平均工資被拉低。然而、城中樓價卻不斷上升並帶動起通脹、對於基層來說是日子一年比一年難過、故在社會上形成一股怨氣。所謂給予年輕人向上流機會、實在是講易行難。除非管治當局願意在政策上作出調整、否則講都係多餘嘅。

巾幗勝鬚眉

扑妹巾幗勝鬚眉

支男驚青又賴皮

鴛鴦共枕不連氣

殺到埋身各自飛

日前奀症教兩大長老扑嘢女、支那男、以及三名小目頭被控硬闖惹事堂罪成、各被判入大牢面壁廿八日。然而、支那男以及一名小頭目臨陣腳軟、並提出上訴要求。判官允許他們保釋外出辦理有關事宜。不過扑嘢女就連屁都懶得放一個、聞判後便登上囚車向大牢進發。聽聞話、她進人牢房後吃的第一份「監躉餐」就是雞翼飯、而且食到舐舐脷。嗱、咁先至稱得上係巾幗梟雄吖嘛！比之嗰壇臨陣發軟蹄嘅支那男、簡直連替她挽鞋都冇資格。難怪坊間流傳、扑嘢女好揀唔揀、偏偏揀着一兜廢柴啦！

誰才是莊家？

賭錢望做莊

做莊殺三方

閒家食夾棍

小鬼稱大王

城中近日嘅熱門流傳就係、縣太爺膽大包天違抗化其大帝命令、拒絕將一名逃犯移交給化其國、反而將之交給朝廷。身為化其代言人之一嘅白鴿桃當然不能坐視、所以立即向縣太爺問罪、並喝令縣太爺解速速作出交代。白鴿話、化其國跟罪惡城是有互相移交罪犯嘅協議、而本城跟朝廷卻沒有這方面嘅協議、並質疑縣太爺憑啥將逃敗交給朝廷。呢嗱、白鴿桃雖然講得難聽、但並無講錯。罪惡城自稱是一個法制健全之地、而且信守國際法的。假如縣太爺未有跟內地簽署司法互助協定之前、便將逃犯送過去確係有問題。但縣太爺已經澄清並沒有這樣做、並加送多一句 “城中任何人都有權自投羅網” 嘅聲明。

霸權

一梅兩個核

無須眼凸凸

獨利眾親離

做人應老實

花大叔在奸島、高麗半島、扶桑島、賓島、袋鼠島等地設立軍事設施對紅家作全天后式監視及圍堵、卻喊紅家將南海島嶼上嘅軍方防禦工事拆除、別再干擾其偵察機到那裡竅探龍土大地喎！嗱、講起南海防禦工事呢家嘢、賓仔有、大馬有、印喱有、坡仔有、安南有、何解花大叔個個唔管、而偏偏管紅家？呢啲咪就係所謂司馬昭之心、路人皆見囉！𠲖家花大叔在高麗裝咗個甚麼殺得系統日以繼夜𥄫實紅家都係咁啦、佢嘅軍機、軍艦、潛艇唔係不斷擅闖入紅家領空和水域挑戰其忍耐能力咩？花大叔討了便宜還要賣乖、對紅家指手劃腳、簡值係不知面懵為何物。難怪街坊都話、睇吓佢仲惡得幾耐啦！

旺暴又有人入冊

鐵窗生涯驚夢散

漫長日子更艱難

膽大莽為不認錯

前程自毀冇得摱

迫爆區怒火開年嘅十名被告爆動罪成、除咗首被告被判摱鐵枝四年三個月之外、其餘被告嘅刑期為兩年四個月至三年九個月不等。令在下𢲷頭嘅就係、被告人當中居然出現一位古希老人。人活到一把年紀還要跟那群後生仔跑上街頭與警察對抗、都可謂食古不化了！難道佢老人家也相信洋硬膠那句「摱過鐵枝嘅人、將會活得更精彩」嘅廢話不成？