係蟲定係龍
背景各不同
不見為乾淨
露底變成蟲
左一聲作出巨大貢獻、右一聲表現卓越、將那位被街坊視為「推、則、閃、避、卸」五味俱全嘅戒律院院長死火原捧到天上去。那怕坊間蟻民鬧爆死火猿拚𠵿兼爛尾、人家兩辦總督雙料明卻盛贊原院長勤勞、能幹、並對朝廷作出巨大貢獻。隨着來就輪咱家罪城縣太打得諗井在送別原院長時對稱贊其表現卓越、跟普羅坊眾嘅講法大異奇趣、簡直係完全唔啱嘴型。街坊齊齊指某人賴屎賴尿、但官家卻稱而頒之、呢啲咪係典型嘅官有官講、民有民講、講人自講囉!
呢嗱、呢個世界上係冇最濕滯、卻有更濕滯。新來嘅戒律院院長井阿画連辦公室都未入就被人冠以僭建井。喺佢上班首日報紙就雞乸咁大隻字報導井府大宅有僭建地窿。嗱、呢招嘢係咪屬口屬面呢?冇錯、就係當年狼豬鬥嘅豬宅地窿風雲翻版嚟喇!如果當年地窿糖唔係要當知縣、佢個地窿就唔會被人篤爆。正如今次一樣、如果井阿画唔係當上戒律院院長、其大宅地窿永遠不為人知的。據報導、井院長嘅大宅唔止有地窿、還有天台僭建嘅玻璃屋和其它僭建物。講起嚟真係唔明白、點解縣府找來嘅當差嘅人硬係周身把柄被人捉到嘅?睇嚟、呢單嘢唔止焫到井院長本人、而且焫着埋佢身邊嘅親人𠻹。咁算唔算係得不償失呢?有位某部門當差嘅朋友𠸎我講、城中豪華大宅十之八九都有僭建、如果要揸正來做就真係一觸發而動全城嘅喎!嗱、在下早就講過、罪城衛門黃氣甚重、在加人之前必須要搞清楚自己身上有冇蘇州屎、否則別來。
冇可能個個做官都咁清高,因為呢啲就係做官嘅潛在福利… 所以,慢慢,一步步便會變成事實,之後咪係真理咯!
回覆刪除難怪有人話、真理是在大炮射程之內架啦!
刪除以後選高官,唔洗四圍去揾,係街邊揾個露宿者,肯定身家清白,唔會有僭建,最重要係班記者無興趣挖料。
回覆刪除有趣、有趣、在下也有同感。
刪除呢招就係再次警告各方豪門貴族,千萬唔好入衙門做事,否則唔只累及自身,仲可能影響埋親朋戚友。
回覆刪除加埋上次墨齊光騙租津事件,打足4年官司,幾乎入冊。
各方人等,唔好以為自己無做錯野,好多野係等你入衙門做高官嘅時候,先話畀你聽你以前做錯左,而家要有報應。
諗井你仲可以搵到能人異士,就係你本事。
作為罪惡城蟻民,我都冇期望囉。
依我睇呢單嘢、更多嘅係籠裡雞作反。
刪除僭建又係唔啱嘅!我記得70年代當差都要查身家清白,點解高官又犯埋的咁嘅錯?又唔係冇屋住喎!
回覆刪除僭建即係唔守規舉、點講都唔唔啱。但講到僭建者、當下坐在議事堂內嘅鬧人精多的是。只係無人去篤爆啫。
刪除聽講以前啲人買咗塊地起屋,鍾意點整點起都得架喎,點解康港咁濕濟,入咗則之後冇得改建、加建架?
回覆刪除新界啲人圈咗一塊地之後,起幾多間細屋都得啦。
未有丁屋制度之前,就真係咁架,土地原本並沒有限制用途,後來港英政府要申報用途和交稅,不准自由起屋,只批准一個男丁在指定範圍(在村界及V zone內)申請起一間丁屋(豁免入則和補地價)。
刪除謝謝自由先生回應。看來要去參考一下貴博的「香港住屋用地」,增加知識了。
刪除更正:前文應是“濕滯”,不是濕濟。
刪除政治唔係講道理、而係講實力。所以一切古靈精怪都不足為奇。
刪除有地位嘅人
回覆刪除做具爭議嘅事叫「規範」
平民百姓
做具爭議嘅事叫「犯規」
這就是人微者賤嘅寫照嚟。
刪除