誰是麻煩製造者

你說我蠻真係蠻

皆因正道太難行

殺人放火撈粗嘢

有錢狂花冇錢還

近日流傳、花家第一夫人霉拉尼亞將一哥府嘅一棵兩百歲玉蘭樹斬除。據講那棵老樹雖然看來老當益壯、實際上早已被蟲蛀到剩得個殼、隨時都有倒遢嘅可能。呢嗱、榕樹頭風水陳話、這棵玉蘭樹物似主人形、跟花家運勢吻合、預料其霸主地位保唔多隱陣喎！從外表睇、花家依然係船堅炮利嘅軍事強權、但口袋裡面袋着嘅不是銀票而係欠單。花家先使未來錢、以致欠下十八萬億巨債、還十世都還不清。如果花大叔唔係佔據着龍頭大佬這個寶座、恐怕花家比沙俄更窮得貼地。當下紅家崛起、人元亦在地球銀號掛牌、大有趁花病擺花命之勢。花家大佬喪普發起爛渣、索性跟全世界賭白頭片。

自從前任花老大奧黑馬上台後、就拿東南二海去迫紅家大佬同佢賭。可惜黑仔馬賭術低劣、越賭越輸。現任花老大喪普捲土重來、而且胃口更加大。喪普在歐洲以花家優先為手段、加速西方裂變。在中東焫着最大火藥庫「三教城」嘅火頭、目的係讓意識劣找個藉口去將率先使用人元為石油結賬嘅波斯一哥萊哈里打沉、以儆效尢。在亞太策動印太兩洋戰略加強圍堵紅家、並利用精良武器、拉一幫打一幫、造成紅家周邊隨時爆發核戰危機、從而將紅家嘅外來資金轉移到花家去。喪普為着保證花家軍火商發大財、不惜在其首份「戰略白目書」內闡明紅家和沙俄都是威脅花家安全和利益嘅對手、藉此為亞洲和歐洲推往戰爭邊緣去。冇錯、喪普呢壇投機商人很快速就將整個戰略網絡張開、而且運行得有條不紊。之但係、呢招屎橋已經用到滑晒牙、難怪有人指責喪普係利用戰火去成就花家嘅霸業。今日嘅花家只能說是外強中乾、除咗拳頭打爆石之外就乜都唔係。萬一中東和三八線因擦槍走火而真的打起來嘅話、欠下一屁股債嘅花家那裡有銀紙來燒？想打代理人戰爭、又怕盟友見到紅家近日示範出擁有一小時打勻全球嘅核武能力而有所縮窒。呢單嘢鬥智鬥力必有好戲在後頭、等着瞧吧！