撳錯制的啟示

優先原來係玩晒

六親唔認起勢𠝹

巡航導彈改成核

地球早晚要打柴

花家老大喪普越玩越喪、一句花家優先就要劏盡全世界、連同聲同氣嘅五眼同盲（大影細家、楓葉家、袋鼠家、柳細蘭家）血緣兄弟一樣……照𠝹。喪普又話要將小型核彈頭裝上巡航導彈、從而將花軍嘅核打擊力量普及化。有人質疑、花家嘅核武力量已經係無人能及、點解仲要將核強小型化、難道唔怕會引起全球性連鎖反應嘅咩？據喪普嘅講法就係、世界越來越不太平。然而、係人都睇得出、世界之所以唔太平、就係花家嘅傑作嚟。試問世上那一處嘅家族分裂、係冇花大叔身影嘅呢？喪普亦想到這一點、才會想出改變核武使用政策來加強花家軍事壓倒優勢。難怪有人話、喪普已經鐵起心腸、以強大軍力將地球監生吞喇！嘩、咁霸道嘅、唔通佢真係唔怕骾頸嘅咩、吓？！

呢嗱、咱家龍的傳人做事作風就比較斯文得多。早幾日前、京司傳出紅家將會停止買入花家債券之後冇幾耐、喪普就嗱嗱聲打電話畀阿爺、表面上似乎係傾北寒問題、但實質上係想了解紅家為乜嘢要停止再買花家債券。其實連阿茂都心裡明白、阿爺係要讓喪普知到、花家每日都隔空對紅家喊打喊殺兼抹黑係對誰都冇益處嘅。坦白講、停止購買花家債券只係濕碎料嚟、如果紅家將手頭上萬幾億花元嘅花家債券狂拋嘅話、我肯全個花家登時天旋地轉。萬一出現骨版效應嘅話、花家想話唔殘都幾難。唔知到係呢個原因、花家智囊就向喪普獻計失驚無神打紅家一鑊、務求令紅家在地球上消失。到時唔止欠下紅家嘅萬幾億債唔使還、仲可以在神州大地上扶植忠心於花家嘅政權、到時神州所有資源盡歸花家垮國企業所擁有。可惜吖、上次夏慧姨嘅誤按導彈來犯警告按紐、使得花家族人在那「卅八分鐘生死邊緣時間內」頓時醒悟、原來打起核戰來係走無可走、避無可避、只能打電話給親人講最後一聲「我愛你」然後等死。聞說那次並非誤按、而係有心安排。因為夏慧姨要話畀所有花家子民聽、核戰是絕對打不得的。我相信所有花人都已經收到架喇！問題只係、究竟喪普收唔收到啫！