點止阿爺夠眼光

看是真時真是假

丹心一片冇下爬

既非我來親手造

縱然漂亮有偏差

呢嗱、真係一百歲唔死都有新聞嘅。身為縣府智囊團一份子嘅人、竟然手持紙牌與縣府門前嘅示威者站在一起抗議縣府政策。冇錯、家陣講緊嘅就係行企會成員葉柳。前幾日佢喺行企會開會前與一群抗議縣府削減某醫院經費嘅示威者一齊示威。葉柳身兼行企和垃圾兩會成員、睇察民意並據理力爭係冇錯嘅。但係佢採取嘅表達方法就大有問題。以垃圾會成員身份嚟講、佢應該在議會內提出動議向縣府施加壓力。在行企會成員身份嚟講、佢應該向縣太爺出謀獻計和力陳利弊才對。但係佢好做唔做、偏偏走去參加抗議示威。咁做究竟係咪代表佢在兩會都盡無效、而跑上街頭示威抗議呢？一個乾逗兩份薪水嘅議員居然跳上街頭示威、只能顯示其能力有所不逮而矣！

常年葉柳曾經係過氣知縣老古董嘅愛將、亦因為勇於承擔責任而獲好評、使得有人以為有機會可以在官場更進一步。但係在朝廷任命新知縣時就是用人唔用佢。除咗葉柳想唔通之外、坊眾亦感到一頭霧水。自從佢自知今生都與縣太爺實座無緣之後、無論在言論或行為方面都起了變化。佢嘅言行有點像被寵壞咗嘅叛逆壞孩子。相信佢給予朝廷嘅好感已經失去、直程係前程似咁咯。也許係當局者迷吧、葉柳在阿狼上任知縣時便開始對佢冷嘲熱諷、而得罪朝廷。當佢知到諗井將會獲得朝廷委任為知縣時便馬上講出滿口難聽嘅酸話、而且暗貶諗井力和為人、使得朝廷更加反感。近日葉柳在某些環節上、跟反派站在一起給縣府難看。就係咁、便加深佢與諗井之間嘅內心裂痕。其實朝廷兩度不用葉柳並唔淨止係朝廷嘅決定。也許你會問究竟係邊個嘅決定？其實答案就係「妥協」兩個字。吓、同邊個妥協？唔好玩啦、你知嘅！係冇？