不聽老人言

忠言逆耳拒收聽

連隨撞板確靈擎

呢鋪直程兜面摑

自尋死路太不應

呢嗱、風水佬呃你十年八年、阿域講嘢從來冇老點街坊嘅。早幾日我曾在網誌勸藍思唔好罵官、免得畀位人家入而令自己吃虧。點不知、話口未完、有班藍思在公堂門外抗議六判爺判決捕頭執法期間毆打途人罪成、其間有一名女士唔知埞責罵六判爺、事後遭巡捕房拘控。呢啲咪就係在下所講嘅畀位人入囉！抗議咪抗議囉、搞到自己都變埋被告、究竟為乜啫？嗱、你咪𠸎我講公平、公開、公正呀？自問我對於呢啲咁高深嘅學問、只係通咗六窺架咋！吓、點解？之唔係尚有「一窺不通」囉！

早幾晚、我同埋一班養狗嘅街坊在榕樹閒談。其中阿藍話、家陣做狗好過做人。佢話、佢本人拍馬都比唔上隻狗咁矜貴。因為佢自己生病只係光顧健康院、最豪嗰次都只不過係搵個中醫把把脈和執番兩劑架咋、而佢隻寶具狗生病就起碼都要花上過千蚊去幫襯獸醫。更甚嘅就係、即使隻狗百厭闖出禍來都唔打得。因為佢屋企嗰個太上皇一定唔會放過佢喎！嗱、呢啲咪叫作打狗都要睇主人面囉！但一直沉默嘅阿黃忽然開聲話、佢就唔似得阿藍咁、連隻狗曳都唔敢打咁弱雞。據阿黃講、總言之一切睇心情而定、如果心情唔靚嗰陣、話之隻衰狗啱唔啱都照打。睇吓邊個太上皇吹得佢脹喎！嗱、呢啲咪叫作同人唔同命囉！唔到你唔服架！係嘛？！