冇得比

比來比去嘥心機

人到衰時當受氣

莫說公理不存在

揀人庇護太堪悲

有人將反派垃圾尊貴住宅僭建與戒律院院長大宅僭建互相比較、仲指責反派尊貴有口話人冇口話自己、企圖凸出其賊喊捉賊嘅形象。嗱、在下並唔係撥冷水、我只係認為兩者實在係比無可比嘅。例如官衰咗唔止丟飯碗、甚至會惹來牢獄之災、而尊貴則未必。官嘅衰嘢通天後勢成眾矢之的、而尊貴唔止冇事、仲可以繼續罵官。尊貴噏錯嘢可以則則膊、而官就必須要鞠躬認錯。其實在垃圾尊貴之中都不知有幾多人係僭建族嚟、只係街坊懶得去理而矣！咁你話啦、比鬼比馬咩？

前晚在榕樹頭聽三叔公分析、新任戒律院院長並不是按既定日期上任、而係臨時臨急被拉夫而來的。據三叔公估計、由於朝廷不滿意前任戒律院院長嘅辦事態度漏氣漏到離奇怪誕、才下令趕在黃亂頭領被押上公堂受審之前先行換馬、以應付不測之變。換言之、新任戒律院院長提前上任就是專程為對付黃亂案而來的。因此佢嘅人尚未到步、就先惹出一大班對頭人來。嗱、我相信三叔公並唔係信口雌黃、而係有根有據嘅。回想早前縣太爺公布、批准戒律院院長在就職後繼續處理其手上幾件未完成嘅私人工作直至完成為止、就足以證明戒律院院長連清理手頭上工作嘅時間都冇便要急忙上任。看來、呢單嘢確實唔係咁簡單嘅、難怪反派要大舉出擊啦！嗱、反派咁做、擺明跟朝廷對着幹。究竟佢哋嘅底氣是從何而來嘅呢？難怪坊間廣泛質疑、究竟今日嘅罪惡城是誰家天下、何解反派居然膽大到連朝廷都不放在眼內？嗱、呢類問題實在太過深奧、恕在下唔曉答。還是留給街坊們自己去想一想吧！