放生放上引

世上向來多騙子

何必專挖舊陣史

得知真相又如何

頂喉頂肺冇藥醫

再過兩日就是第一期「補飛」擂台開打嘅大日子、而擂台篩選委員會（篩委會）係有責任阻擋毒派人士混上擂台的。之但係、在參賽者名單上卻出現（曾經公開焚燒歸本法）耦弱犬的名字。藍族當然唔高興、並要求篩委會取消耦弱犬嘅參賽資格。嗱、呢趟我又要撐一撐毒派喇！我唔知到藍族投訴人係眼大睇過龍、抑或係有其它原因而睇唔到名單上除咗耦弱犬之外、還有剛被打柴嘅夭重閹也被列入參賽者名單之中。既然連與台毒結拜嘅夭重閹都可以名正言順上台參打、點解耦弱犬就唔可以？喂、篩委哥、究竟你哋有幾多套標準架、吓？！

話時話、篩委會上次無𠸎𠸎畀一群毒派分子上擂台、結果仲打贏比賽、在事後嗰班篩委居然連交代一聲都欠奉。之但係、今次舉行嘅係補飛賽、理應人人都打醒十二分精神至係嘅。誇張啲講句、就算係唔識得耦弱犬是何許人、但總會認得出夭重閹係毒派代表嚟啦！係嘛？！即使班篩委賴上次純屬睇漏眼、但今回又點解會重蹈覆轍、再一次放生夭重閹？唔通呢趟賴鬼揞眼兼臨時性雙耳失聰？嗱、上次已經搞出一鑊泡來。所以我堅係唔相信、今次仍然有人咁唔小心嘅。一係、篩委會內部鬧鬼。一係、有人雙痛腳不由自主。再唔係嘅話、就一定係奉旨放生。講到係奉誰的意旨、咁就要佢哋至知。唔知到係咪有咁啱得咁橋、今次賽前發生多起事件、都係直接成間接替黃族趨谷人氣嘅。嗱、話口未完、連唱歌法都搬埋出來為老黃打氣喇！點解唔可以等多兩日才公布、硬係要在咁敏感嘅時候揚出來？所謂比起彼落吖嘛！相信劃公仔無須劃出腸、大家都知到有利形勢是則重於那一邊的。唔通真係如街坊話齋、放生放上引係搣唔甩嘅？嗱、就算你話我潑冷水也好、話我傳播陰謀論也罷、總之我就係覺得藍營今次只係空歡喜一場架咋！