2%風險都死人

心術不正夾搵丁

醫療格局兜巴升

當家大姐圍威喂

良知賣出八九成

繼早前一名公家醫院聘用嘅（特約）外科醫生在手術期間忽然掉低已被開刀嘅病人留在手術室、而自己就返回私家醫院做另外一個手術、數小時之後才回到公家醫院繼續先前手術嘅驚人聽聞畸屎之後、現在又輪到一項被外科醫生介定為只有 2% 風險嘅手術搞出人命嘅個案來。據醫院解釋、手術是成功的、只係病人在手術後出現併發症而死亡。在下唔懂得醫理、但據死者家屬講、當醫生從手術室走出來時表示手術很麻煩極之難做、似乎在暗示病人可能會蒙主寵召。冇錯、任何手術都有風險、而病人亦在事簽署認知風險確認書嘅。之但係、只有2%風險嘅手術都搞出人命、又確實係不可思議嘅。

本城人口越來越多、而公家醫療服務步伐追不上、已經唔止係三幾年嘅事。然而、公家賬房雖然年年豬籠入水、偏偏在這個問題上一直左閃右避、根本上沒有長遠解決方案。即使被藍方喉舌喻為乜都掂嘅現任一姐、亦只能做到頭痛醫頭、腳痛醫腳、仍然見唔到有啥長遠良策。一味靠唱好是改變不了問題、欠缺長遠策略更加會使得問題深化。君不見、每爆鑊一次、公家就加注一次、但問題還不是同樣在加注嗎？在貪爵士揸拂年代已經常常出現配錯藥、判錯症、打錯針、做錯手術、劏錯病人、甚至連人家個初生嬰兒都可以唔見咗嘅。時至今日、情況還不是一樣係糟到連阿媽都唔想見咩？原因就係近廿載以來、本城只沉醉於政治鬥爭之中。咁搞法、公家服務唔係「憂質」才怪。嗱、冇辦法架喇！你睇吓、家陣我哋嘅議事堂剛剛又放咗兩名鬥士入去、登時搞到會議煞停擇日重開。一姐那句所謂大和解雖然被藍營喉舌讚得天上有地下無、亦只不過係有姿勢冇實際之作。議事堂已經變成垃圾會、民生項目備受拖累、而一姐滿以為一味討好就可以取得反派合作、簡直係異想天開。街坊們、你哋都係自求多福吧！