呷醋

罵我公然大細超

有口難辯懶得聊

這回志在威一次

內裡乾坤你未知

日前中廠一姐林亞井帶埋內務總管張電鐘、財務總管矛波陳、戒律總管脆弱蓮、以及蚊責班一眾頭領前往白鴨幫、出席該幫嘅畀面派對。期間老鴨明話李被安排上台獻唱、而一姐亦識做、馬上大解慳囊捐出三萬両銀以示支持。殊不知在翌日、身痕幫首領葉亞柳（掃把姐）、以及問卷聯首領旺角健兩人異口同聲、齊齊指責一姐做法等同賣票、做壞規舉喎！旺角健質疑一姐日後點至能夠做到一視同人。另一方面、葉亞柳亦質疑、如果佢派愛將開地榕上台獻歌又唔知值幾多両喎！嗱、講來講去都係埋怨一姐局部性色盲、眼中只有黃色而無藍色、才覺得冇飛屎之嘛！

就在今早之嘛、神經事務部阿頭長雨褸在議事堂發言四十秒、以及只須不足兩分鐘便極速通過一項本來拗到面紅面綠（總值一千一百三十一億両銀）嘅公共開支撥款。嗱、呢啲咪就係投桃報李嘅典形例子嚟囉！除笨有精架！一姐只係掟區區三萬両銀子出嚟、就做出大和解效果、真係前無古人架！咁、你話有乜嘢唔好？點解咁都會有人呷醋架？講真啦、藍營有阿爺呵護、絕對唔使擔心荷包乾硬化、更加唔使憂急性發錢寒、一姐梗係無須吓吓都自己扲荷包應酬佢哋。呢啲係政治現實所然、並唔存在一姐吝嗇銀両、以致只係討好黃營而冷落藍營嘅。所以嘛、旺角健和掃把姐兩人對一姐嘅批評未免酸味太濃了！如果我係佢哋嘅話、一於合埋個尊嘴、以免開口𪘁着脷做咗非洲和尚（黑人僧）都唔知到吖嘛！