搞好「憂」質教育

阿哥吝財拼命慳

全力解救太艱難

只係偶然失預算

反而救活眾生番

雖然庹縮大掌櫃被人狂罵孤寒、但他對個別政策範疇是非常厚待的。例如在教育方面增加24.8%撥款、總數高達1137億元、成為公家撥款最高嘅項目。相對而言、那些甚麼醫療、安老、綜援等撥款就濕碎得多了！大眾都有眼睇、本城嘅教育有幾禁“憂”質架啦！由其是大教館蘊藏着一群爛教頭、而這類家伙將人家仔女教到爛笪笪、仲教唆班學生去破壞社會秩序和安寧。嗱、公家撥出嘅款項係公帑嚟嘅、應該用得其所才對。因此撥款係必須有條件和有選擇性、唔以得現在咁不論好醜亂派一通嘅。眾所周知、慈善團體只係向那些品學兼優嘅貧苦學生頒發助學金、目的係為社會培植人才。之但係、公家卻實行見者得食嘅大鑊飯政策、以致社會上出現一大群粗口爛舌行為粗鄙嘅學雞。難怪街坊鬧爆公家出錢培養惡徒、危害社會安全啦！在下很想知到、當街坊都不信任公家嘅話、結果係對誰有利、對誰有害呢、吓？！

講開又講、日前宮能組代表舐缸哥寫信給議事堂主席大口哥、要求在財務總管劏房哥講解完賬務預算報告之後、便召戒律長僭建姐到議事堂解釋一下、點解有咁多名佢唔改、而偏偏要將自己叫作「僭建」喎！可惜大口主席以傳統習慣（當財務預算報告完成後、議事堂便休會）為理由拒絕咗舐缸哥嘅要求。嗱、我唔認為舐缸哥撈咗咁耐仍然係唔知到有咁樣嘅一個傳統習慣、但我相信佢係旨在把握機會向街坊展示反盟追殺僭建姐意欲未減、從而去沖淡「大放生」所引發起嘅「黑市交易」疑雲。坦白講、呢單嘢做到咁淺白、擺明係無私顯見私。人家僭建姐早前先至話送咗份「放生」大禮畀反盟、再加埋劏房哥剛剛送上嘅那筆巨大嘅「教辱」贊助、舐缸哥當然唔會笨人出手當眾反轉豬肚、所以佢惟有合埋把口、讓其他人隨便挖啲嘢出來鬧一陣就算。俗語都有講啦、打者愛也、愛者打多幾下吖嘛！相信僭建姐係唔會介意嘅。呢趟究竟係耍花槍、抑惑係打真軍、大眾心中有數。嗱、世事嘅嘢就係咁混賬、街坊們只宜當戲咁睇、千祈咪聯想得太多喎！