非法 合法 枉法

非法成合法

有龍大家刮

食完舐舐脷

添食嘴唔抹

罪惡城果然係遍地黃金、問題係你曉唔曉得、有冇本事、夠唔夠膽去執之嘛！嗱、我哋嘅管治單位趕絕籠床、就係為咗避免受到呢類不人道嘅居住環境拖累、而破壞東方之豬嘅美譽。如今總算做到拆籠床蓋劏房、在幫助劏房業主提高收入之餘、亦成功為基層低端群組提供太空倉式睡房、千層糕式床位、以及一腳踢式蚊形套房任君選擇。有咗這類世界第一「貴」嘅新形住所、足以證明我哋罪惡城係冇窮人嘅。所以嘛 … … 雖然居住質素不變、劏房業主就變成富翁了！對於劏民來說、唔同嘅就係、當年做籠民還有能力吃好些、吃飽些、而今日升呢做咗劏民之後就要睇餸食飯喇！你知唔知到、點解近年煙民人數不斷下降？原因咪就係在於一個「慳」字囉！

當日老表湧入罪惡城與街坊鬥快掃貨嘅全盛期、懂得賺快錢嘅人就紛紛把空置物業改為主打內地客嘅無牌旅館。當時無論黑白兩道都係做緊呢件事、所以無人出聲。如今老表入城人數大減、市面上主打內地客嘅商鋪陸續摺埋、持牌客棧生意難撈、所以猛呻冇牌旅館多過持牌客棧、希望管治單位幫吓手將佢哋摺埋囉！之但係、在大和解前提之下、管治單位處理陰宅嘅手法、亦只不過係呼籲街坊切勿幫襯非法陰宅而無即極取蒂、所以對待非法陽宅亦只能以保持同樣做法。否則、劏房早就被摺埋咗好耐架啦！仲有呀、班街坊日日發樓寒、仲話有錢都租唔到樓。期實管治單位雞食放光蟲、城中都不知有幾多空置樓房、只係唔方便踢爆之嘛！如果唔係、又點會有人提出要徵收「空宅」稅？之不過、唔係話想徵稅就徵得架！因為「空宅」一經曝光之後、就會失去漂白作用、到時嗰啲發霉銀器都唔知點處置喇！難怪江湖上傳聞指、如果樓宇泡沫爆破嘅話、連青山都應付不來啦！