忌吉王又病發

傻堅向來多忌吉

判爺見佢氣都咳

大影細國收容佢

咪在香城做阿七

俗語有話、教而不善應該打。嗱、如果打手板都仲係教唔聽、就必須施與重罰、務求滋事者能夠感覺到乜嘢叫做痛才行。絕對唔應該好似今日嘅六判爺咁、高高舉起、輕輕放下、任由嗰啲傻人拿六判爺來消遣吖嘛！吓、我講緊邊個？唓、之唔係綽號「長島忌吉王」傻堅囉！嗰條友被「法喚處」拒之門外、又被六判爺罰佢交「糖費」仍然係冇有識死、繼續將六判堂當作係佢嘅遊樂場。傻堅今次又要針對銀建聯代表鄭亞信嘅當選而要求翻案。理由係鄭亞信所代表嘅幫會「銀子建港」跟「銀子建國」同屬毒派組織。嗱、你話嘞、傻堅呢壇嘢係咪專心要拿六判爺來消遣？

話時話、一般正常人是不會亦不敢去惡搞六判堂嘅。之但係、如果當事人係一名神經佬而又獲得一大群比六判爺輩份還要高嘅法術界人士在後面力挺嘅話、咁就冇有怕架喇！事實上、罪惡城嘅法規只係用來約束那些安守本份嘅街坊。對於那些聲大夾惡又或者精神唔正常嘅人物來說、法規是可有可無。即係話、當佢哋須要時、法規就會產生應有嘅力量。如果他們不須要時、法規就連狗屁都不如。君不見、毒派嘅兜婷不獲准上台參加垃圾填氹大賽、而同樣係毒派人馬兼當眾焚燒角旗嘅區喧喧就獲得批准參賽、而且仲打贏埋𠻹。這件事足以證明罪惡城法規嘅靈活性相當大、否則亦唔會發生咁多難以解釋嘅事出嚟。但今次係由一名無聊嘅傻阿伯玩文字獄、夾硬老屈銀子建港聯盟係港毒組織。六判堂淪為傻堅嘅遊樂場、試問情何以堪？當今社會上已經有太多傻人架喇、如果我係六判爺嘅話、一定判傻堅入青山長住、以免佢到處賴「史」吖嘛！