明妥協 暗互撚

你演紅面我演黑

冬前臘鴨撇唔甩

先天注定唔爭氣

不作忠臣做阿七

打得姐呢頭話要促進社會和諧、嗰頭又批准劏房哥炮製嘅惹火未來賬目報告出街而鬧得滿城風雨。江湖流傳、今次事件令到搶得先機向揸拂當局要求派街坊嘅藍營政客、自取其懵。有人話、係打得姐布嘅局、亦有人話那是叛逆台嘅演員三碌木為了離間打得姐跟藍營之間嘅關係、而故意散播出來嘅流料嚟。嗱、打得姐使得一群恨她之入骨嘅響樹派人馬為她抬轎、實在唔簡單。如果我話班友仔係無事獻欣勤、你估會否有人信？就事論事、正在補選在即嘅時候爆單咁嘢出來、難免會令街坊聯想到有人旨在扶黃滅藍。難怪江湖上有咁多人質疑、究竟打得姐是姓藍還是姓黃啦！從種種跡象看來、我覺得傳聞不無道理。假如我係總舵主、我都會派些人在她身邊好好的照顧着她、免得她受到騷擾而擔擱公務。依我睇、在今後幾年內中廠嘅妖氣將會越來越旺盛、就算係張天師下凡都冇符。

上屆揸拂人爭霸戰勝出嘅雖然係阿狼、但係城中大戶亦成功將阿𠾍哥扤入中廠掌管大賬房、目的係撚住阿狼係頸、以免佢動用公帑收賣人心。今次大戶寵兒打得姐成功入主中廠、總舵亦將劏房哥擺上大賬房掌櫃之位、其動機大概可以不言而喻矣！可惜被安排主管戒律院嘅僭建姐第一日返工就雙腳齊𨃩、撻到四腳朝天都唔在講、仲連集食指都向外拗柴。總舵早已有所計算、所以晨早吩咐定西廠大當頭十二哥、在必要時就帶埋個令牌進入中廠跟打得姐拍住上。問題係、點解上屆嘅阿𠾍哥能夠全程撚實阿狼條頸、而這屆劏房哥和僭建姐卻反過來被人鉗制？其實道理很簡單、因為阿狼嘅情況跟劏房哥和僭建姐一樣、都係與中廠無血緣關係嘅外人、而打得姐跟阿𠾍哥同樣係由中廠一手養大嘅、所以無論在天時、地利、人和等方面都占盡優勢。大家都有眼睇、當年啱曾係點樣擁兵自重為所欲為架啦！再講、上屆嘅戒律長揼雞哥雖並非中廠出身、但畢竟不是姓藍、所以兩邊都不想開罪、惟有將啲濕滯嘅畸屎揼住嚟做直至身退。嗱、你話嘞、揸拂堂嘅形勢都惡劣成咁、罪惡城點會有運行？

註：「撚」有兩個讀音（lun / lin）例如「撚手小菜」、「被人撚住條頸」。