神仙難救

利是嫌少鬧跳樓

令入聽後猛𢲷頭

今日衙堂多孽障

再唔改革聽揸兜

呢嗱、勢估唔到有人因為逗少咗利事就要跳樓、仲搞到上埋新聞紙頭版。事緣一名久病一年並在年初五復工嘅豪宅護衛員（食蕉哥）被上司調派去守貨𨋢、搞到佢只能逗得一千元利是。食蕉哥諗起往年逗到萬多元利是錢、而今年所得卻連零頭都比唔上便心有下甘。就咁一氣之下、長期荷包乾硬化和急性發錢寒嘅食蕉哥決定尋死。於是穿起一件寫上抗議字句嘅衣服、跑到顧用他的機構辦公大樓玩無繩笨豬跳。經過一番擾攘之後、食蕉哥才被勸服打消輕生念頭。

呢嗱、以上事件看起來有點胡鬧。之但係、講到錢銀呢家嘢、確係會令人變得瘋狂。也許、一萬元在一般人眼中並不算甚麼、但對於那些荷包乾硬化、急性發錢寒嘅人來說錢就是命。其實在繁華嘅暗角裡面、都不知隱藏着幾多係急性發錢塞嘅人士。有份調查報告顯示、接近四百名「無家者」在廿四小時服務快餐店過夜、而且人數有上升之勢。本城生活成本高企、在職貧窮者激增、而大賬房嘅銀両多到唔知點使、但揸拂當局唔止不思改善、甚至連拎啲錢出來𧨾吓街坊都唔肯、分明係製造貧窮和怨氣。今次獲得劏房大總管額外「奸愛」嘅坊眾之中、並不是每個人都係荷包乾硬化、更不是急性發錢寒。當中有些人甚至係隱世富翁嚟、只係一直閉門造車嘅揸拂大老爺睇唔到啫！現在很多人都睇唔過眼、喪插劏房哥嘅做法係斷估冇辛苦。我唔係靠嚇、過幾日就進行補選、現在人人㷫合合、個個發忟憎、聽聞有不少對投票冷淡多年嘅中間派街坊、打算將手中票投給愛生事參選人、以表示對揸拂堂不滿。我唔知到這個情況係咪「大和解」嘅一部份、但我感覺到街坊對揸拂堂嘅反感程度成已經到咗臨界點。如無估錯嘅話、愛生事政客為着要報答選民支持、必會在短期之內迫揸拂人重啟政改。無論成功與否、總之這個「劫」是避免不來的。難怪咁多街坊都話、當今中廠嘅揸拂班子作風倒行逆施、唔知到係阿爺又再跌眼鏡、抑或係街坊注定冇運行啦！