善惡一線差

越聽越覺無厘頭

口水浸瓜大水牛

蚊蟲曱甴皆謀動

簷前滴水也倒流

嗱、一姐白在鴨幫畀面派對豪擇三萬両銀點唱費、居然一石擊起千重浪。近日榕樹頭說書人東方不敗指出、中廠一姐跟總舵主對着幹。這指控實屬非同小可、一姐假假哋都係罪惡城第一號人物、手中掌控着本城富貴與閉翳嘅命脈、如果話佢作風打例蹆還好、但指佢跟總舵主對着朝乃係以下犯上嘅死罪嚟、係唔講得笑架！之但係、一姐三名副手實在太過唔爭氣、否則亦唔會招惹咁多莫明其妙嘅指控。首先、戒律堂一姐剛上任就踩中地雷、揗雞起嚟將所有護花踐紅嘅一干人等全部放走。其次就係財務一哥派錢都派到神憎鬼厭、比前任嘅廢柴大長櫃更加廢柴。第三係內務大總管呢頭話誓要打柴四子將落咗袋嘅銀両嘔番晒出來、嗰頭又教追數組在收數不成之後點樣撇賬喎！嗱、呢班大泡和做出來嘅嘢全都是示弱於人前、咁想話唔惹人惡批至奇啦！係嘛？！

記得一姐參加打擂台期間、被黃營冠以阿狼二點零、殊不知佢入主中廠之後又被喻為啱憎二點零。如果係咁嘅話、罪惡城四年內都太平不到那裡去。但見一姐在民生方面呢度掟嚿錢、嗰度又掟嚿錢、唔多似啱憎作風、反而係想舒緩問題。因此在目前嘅表面證據看來、一姐晤唔似係阿狼二點零、亦唔似係啱憎二點零。若然單憑佢近日與黃營四老祖密會、就斷定係跟總舵對着幹、未免過於魯莽。一姐在前朝任職多年、與黃營有交情係很自然嘅事、沒甚麼好大驚小怪的。難道要人家一朝得志就馬上反眼唔識以前朋友嗎？因此江湖流傳、一姐其實想以自己與黃營四老祖嘅交情去感化對方、你可以話佢太過天真、但未嘗係冇可能。也許你會質疑、何解近日我會對一姐嘅睇法比起之前正面得多。我可以告訴你、我都係見嗰樣、講嗰樣、就事議事而矣！所謂路遙知馬力、日久見人心吖嘛！只要我們畀啲耐性和客觀一點、唔使幾耐就會睇出事實來的。大家不妨慢慢的去欣賞這齣戲吧！