賴住先？

睇見就牙煙

文雀定老千

難瞞天上眼

惟有賴住先

某日白鴨幫幫眾腍柿堅聲稱、無端端被人夾咗上車、又無端端被人用釘書機在大臂打釘。據腍柿堅講、在幾日前已經收到電話警告、喊佢唔好去見流料波嘅遣孀流料霞、否則就會好大件事。後來腍柿堅將此事告知大撞師李翰簡。但李翰簡說那可能是一場胡鬧劇、無須要報警喎！結果在兩日後、腍柿堅就出事了！當他醒過來之後、發現自己被人安置在西宮灣曬太陽、但他並無立即報警、反而先召開記招、然後再斯斯然去醫院求醫。據腍柿堅講、擄走佢嘅人以北話問佢是否乜乜教嘅教徒、又提到流料霞、臨走前仲聲那是上頭嘅事、警察都冇佢哋乎嘅喎！因此腍柿堅認為佢自已係被強力部門嘅人虐待。嗱、呢單嘢扯到咁衡、今次大概有大條理由畀反盟來𢵌冧「一站兩查」喇啩！

嗱、當做嘢做到過晒火位嘅話、就會顯得是無私顯見私架喇！試問、如果你係法術界高人、而又知到此事與一名敏感嘅政治人物有關、仲會唔會喊當事人無須理會？再講、假如自己從正在執行一件見光死嘅任務時、會唔會驚死對方唔知自己個底？搞到明顯成咁、分明係有蠱惑啦！係嘛？坦白講、強力部門嘅人個個都受過非常嚴格嘅訓練、做嘢又點會咁兒戲？如果係嘅話、嗰啲人唔係白撞嘅、就係流嘅。江湖上對此事有兩種講法。第一、可能係有人去碰一個絕對唔應該碰嘅人而觸怒某人而遭受警告。第二、就是有人為咗要達成政治任務不惜借中央來過一棟。如果情況被第二題講中嘅話、簡直係壽星公吊頸、嫌命長咯！嗱、平情而論、當事人所講嘅遭遇出現太多講唔通嘅情節。由其是當事人清醒過來時唔係立即報警、而係打電話去報館找記者、就己經係反常之極。單憑對方講北話和說出流料霞嘅名字、就咬定對方係強力部門嘅人、簡直係斷估冇辛苦。用釘書機在大臂上打釘、似係惡作劇多過似警告。注於點解對方會得知當事人要去見流料霞、本身就已經係值得玩味啦！係嘛？！嗱、我聽聞心水清嘅街坊話、可能有人要“升高勾”自己係不懼強權嘅鬥士、搏街坊抬佢上垃圾會填氹擂台爭奪戰、撈番個尊貴來做吓喎！嗱、我就唔係幾信嘞、唔知你又信唔信呢？