反盟賴嘢

阿堅做事大荒唐

屈人累己更不當

反盟抽水齊賴嘢

被人笑到面都黃

在腍柿堅被捕之前、白鴨幫與大撞幫聯手向保安大隊長比加超施壓、要跟他展開有關紅偵組踩過界做嘢嘅討論。其實係人都睇得出、討論是假的、想趁勢推倒一站兩份才是真的。因為這工程一旦被𢵌冧、反盟就有一件大功勞握在手中、而背後主子就會論功行償、到時就唔使驚制水、亦唔使怕被主人遺棄。之但係、有冇必要搵個人自編、自導、自演一齙“紅偵打乜嘴”嘅爛戲出來老屈紅家、咁就見仁見智咯。你睇、當腍柿堅事件公開的第一刻鐘、就有街坊表示質疑、甚至有人提出多處疑點來證明事有蹊蹺。在天眼協助下、謊言終於被識破。至於腍柿堅是自作業、抑或是無辜、那就要待巡捕房來證明、而白鴨和大撞兩幫人嘅囂張氣焰、就像看更李、鐵頭可、剁人李等抽水梟雄一樣、一下子全部消失晒喇！

俗語有講、先撩者賤、打死無怨。腍柿堅老屈紅家既愚蠢又危險、所以佢係注定失敗嘅。試想想、如果有個人眼光光咁冤枉你、你會坐視嗎？城中政棍做咁多嘢去焫㷫紅家、無非要令紅家惱怒紫荊人、以及加深社會矛盾而達至其政治目的。然而、這類政棍並唔係要玩死本城、而係要玩到半天吊咁款。因為只有咁樣、才會有戲可以繼續唱落去吖嘛！假如搞到揸拂堂無力控制嘅話、紅家就必須按照歸本法規定派遣街坊軍出來鎮壓。如果搞成咁、兩制就會變成一制。呢個結果對於政棍來講、等同自斷財路兼自掘墳墓。因此說他們旨在玩殘而不是玩死、就係咁解吖嘛！

之但係、坊間陰謀論流傳、今次老屈紅家是一條反間計嚟。有人被收買做叛逆臥底、並刻意部署這個漏洞百出嘅反間計來引反盟踩落個屎氹度、目的是要令到反盟在嚟緊嘅垃圾會填氹擂台大賽承受一次慘敗。嗱、呢壇嘢係唔係有點熟口熟面呢？冇錯嘞、腍柿堅嘅身份猶似當年戰中開始時帶領一支神秘兵團到望角保護書生嘅阿癲。因為神秘兵團越幫越忙、越幫越兇、使得坊眾對戰中嘅態度由支持變成反感。在眾叛親離之下、戰中亦只能落得慘淡收場。如今阿癲一聲拜拜便歸家安享晚年、但反盟嘅聲望亦從此一蹶不振。當年反盟被愚蠢嘅妖蜓所累、今日卻被幾隻一心抽水嘅過氣笨老鴨和一個潦倒嘅咕哩頭拖垮。睇嚟、反盟氣數將盡矣！