誰在轉移視線？

唔係口糠糠

口爽大隻講

無心撕破臉

有災用你擋

自從兩學三𡃁被判坐監之後、反盟那個「罰即是不罰」嘅如意算盤就此被砸碎。由期是尚未被判刑嘅黃亂搞手、一諗起坐花個躉就人皆心驚肉跳。再加上腍柿堅駕禍紅家會一事敗露之後、必會對嚟緊嘅議事堂補選擂台大賽構成不利影響。在一為功神、二為弟子之下、惟有請戒律大總挨義氣載上打壓異見分子嘅帽子、從而明批戒律院、暗斥翻案堂、企圖為反盟營造出一個受到政治迫害嘅型象出來見街坊。繼大撞幫頭領惡形亨以一條不成問題嘅問題（有冇為咗要釘死三𡃁、而否決檢控員不提翻案嘅決定？）來追殺戒律大總管之後、又輪到幫主戇嬌楊向戒律大總管使出同一道板斧。難怪終極堂過氣嘅頂級六判爺死火熊能也跳出來、償兩人各食一碗兜巴灼麵、以示回報兩人毫無道理兼亂噏廿四。

坦白講、戒律大總管有冇否決過檢控員嘅不提翻案決定並不重要、重要嘅係三𡃁是否罪有應得。高級六判爺嘅判詞顯示、當日低級六判堂處理此案時有人犯下原則性錯誤。咁即係話、打從公平、公正、公開角度來看、戒律大總管不提出翻案嘅話、先至係唔妥當。但偏偏有人在法理講不通就同你講陰功嘅情形下、監硬法治已死、三權分立亦被破壞。嗱、莫講話罪惡城奉行嘅係行政主導而非三權分立。就算真係有三權分立、亦唔見得受到今次三𡃁入冊而被破壞。因為大撞公會嘅現任及過氣兩位會長、以及細撞公會現任會長都異口同聲話、翻案堂嘅判決是恰當的、亦否定三𡃁係政治犯嘅講法。照咁睇嚟、掛在反盟嘴邊嘅三權分立、以及公平、公開、公正都一樣、全部都係大隻講嚟。今次翻案六判堂上演嘅先至係如假包換嘅司法獨立。曾經有人話我知、反盟今次對六判界恩將仇報、連已經退隱嘅六判界祖師爺死火熊都睇唔過眼、跑出來指着李翰簡個鼻大罵反骨仔。嗱、我就睇唔出呢個傳聞係真唔係嘞。唔知你又睇唔睇得出呢？