冧井抵鬧

子踎監

父為榮

冧井爆響口

兜父勁詐型

世事難分真定假

諸君切勿表錯情

這邊廂、兜捹匡的父親兜老爹話、以佢個仔兜捹匡踎監為榮、仲吩咐捹匡洗乾淨啲個八月十五至好返出嚟。那邊廂、冧井唱反調、聲稱困在兒身、痛在娘心、登時氣得猶如「床板夾」嘅兜老爹連隔夜火都標埋出嚟。在屎可忍時、尿不可忍之下、兜老爹喊冧井咪過母愛泛濫、因為佢兩仔爺都骾唔落喎！所謂崩口人忌崩口碗、既然贏了陣、那又何必連牙較都要贏埋呢？事實上、人家兜氏父子從來冇諗過、出來圍威喂出吓風頭都搞到要做踎監咁大劑嘅、家陣仲要被人潤到有氣冇埞唞、你話唔嬲就瓦燒啦！係嗎？難怪連戇痴瘋嘅老爸都忍唔住、跳埋出來將冧井當作為出氣袋啦！依我睇、冧井都係少講兩句為妙咯！

呢嗱、一向語不驚人死不休嘅大撞幫幫主戇嬌楊就醒目得多喇！佢一見到、原來兜老爹係唔鍾意別人同情、就立即奉上“踎花咗個躉、人生更精彩”嘅金句出嚟潤一潤兜氏父子。嗱、我唔知兜老爹聽聞戇嬌楊嘅潤言後有何感受。但我亦是為人老竇、當然係唔會支持自己個仔去踎監嘅。如果係嘅話、又何必窮自己一生精力去供個仔讀咁多書呢？雖然我會尊重兒子嘅選擇、但絕對唔會認同「踎花咗個躉、人生更精彩」呢類在紫荊城社會上完全冇市場嘅鬼話。既然戇嬌楊認為踎監係咁精彩嘅話、點解佢自己又唔去踎番一年半載、以之示範呢？在罪惡城這個人浮於事嘅社會裡面、踎過監嘅人、無論讀過幾多書都很難找得一份有向上流機會嘅工來做。若然當事人不是挨騾仔就係去當匪類、否則就惟有繼續在政壇上打拼。只要肯埋末良知、盡其嘩眾取寵之能事、要進人議事堂撈個入息豐厚嘅尊貴來做亦非難事。就算落選而又不想當匪類亦冇問題、只要能夠豁出去、拋個身上前線打衝鋒、亦可以在三餐餓食之餘、利用唱衰龍族嘅機會周遊列國𠻹架！對於政治操盤人來講、呢類好使好用嘅爛頭卒就係佢哋邁向富貴嘅踏腳石、就算揞住個良心、多講幾句違心話都要架喇！知冇？