撤資的啟示

既然翹口又㔆手

話你唔聽我便走

莫道東家無義氣

此刻一去勿翻頭

日前在大牌檔遇見多年失散咗嘅同學仔阿巨、得知他將會被公司調職去歐洲。據說、阿巨嘅顧主力牆大老闆陸續出售其手上與紅記合作嘅資產、甚至連麾下嘅常窒地產都易名為常劏實業。據阿巨講、近年大圈資金（大部份都是紅記資金）不斷湧入本城地產市場、力牆大老闆雖則財雄勢大、亦感難以招架。因此、他把手頭上那此與紅記合作嘅資產賣得就賣、把投資眼光轉向西方去。據統計數字顯示、今年上半年城中大小地皮機乎全都被紅資投得。阿巨直言、力牆大老闆委實敵不過他們、雖然他出售與紅記合作嘅資產而遭指責、但在商言商、唔講利益、唔通講心咩！總之鬧就隨便鬧、力牆大老闆就是繼續淡出紫荊城矣！

紅記嘅十九大股東大會下個月便召開、小道消息盛傳總公司內部有頗大嘅人事變動。據說掌管紫荊分公司業務嘅常任董事雙失江將會退休、空缺可能會由董事局董事之一嘅栗煎薯來填補。換言之、總公司要加強監管紫荊分公司營運嘅力度。咁即係話、總公司要清洗所有三工系勢力、加強管理親總公司的那班車邊友、以及打擊那群前事頭婆餘孽。嗱、咁搞法、莫講話車邊友冇咗「吃裡扒外」嗰支歌唱、即使係事頭婆餘孽賴以為生嘅那條三工系大水喉亦被關上埋。照咁睇嚟、總公司真的要出手撥亂反正、相信對於那些專門搞亂分公司盤數、然後混水摸魚嘅害群之馬來講、絕不是好消息。但對於大眾小股東來講、這才是好消息。因為這起碼會滅少分公司內鬼打鬼嘅現象、從而減輕總公司在分公司推行新政策時、所遇到嘅阻力吖嘛！坦白講、在過去廿年、正正就是分公司長期被一小撮專呃總公司錢嘅人馬騎劫而變成九反地、前三任總經理亦是無所作為、如果今屆總經理繼續蹉跎落去嘅話、分公司就會變成總公司嘅負累、到時就真係前途盡毀。雖然力牆大老闆用行動證明、不看好其家族在本城嘅經濟發展前景、但並不代表分公司一定唔掂嘅。在下相信、只要分公司在新人事新作風帶領之下、能夠實事求是咁去做好本份、以往嘅頹氣一定可以被洗清、並且能夠重新振作邁步向前的。