2017年7月5日星期三

大歸廿載


回歸二十年
唱好大團圓
內裡藏爭鬥
心國未相連

如果我話、剛卸任嘅揸拂人阿狼好勇鬥狠兼自我感覺良好、而且開出十張支票、七張空頭嘅話、相信唔會有太多人反對。之但係、講到撕裂和破壞社會安寧呢方面、就唔可以賴晒阿狼。但係反派卻異口同聲指責阿狼是這方面嘅罪魁。依我睇、反派跟阿狼其實係半斤八兩嘅搭檔嚟。但反派指阿狼將港毒撩出來、是不正確的。從另一個角度睇、是反派護豬不成發爛渣、故在阿狼上台後、暗中將港毒從校園內堆出社會靠害街坊、然後再將一切人晒阿狼數。呢種手段跟五年前某人布置一個黑色飯局招呼阿狼嘅代表團、然後老屈阿狼興黑幫勾結恐嚇土紳嘅畸屎、簡直係同出一轍。嗱、呢啲咪做係反派無中生有的作風嚟囉!當下連總舵主都話不能容忍港毒、可見此事並不簡單。

大歸都已經過咗廿年、但揸拂堂卻做鬼都唔靈。煲燶廿三味都唔在講、即使係思想教育(思教)和整容改面(整改)亦冇齙好戲。咁搞法、在施政嘅時候當然係綁手綁腳嘅。嗱、大家都見到、在黃亂和旺亂之中表現得最狼胎嘅人、都係十來廿歲佔大多數。而呢班人就係在紅旗飄揚之下、接受番邦餘孽洗腦架喇!由此證明、歷屆揸拂人都係唔多稱職嘅。假如當年老古洞唔係在煲廿三味時被架忌冷在兜背脊捅一刀、罪城今日就唔搞到人人肝火盛、個個發高燒、並且燒到全城㷫烚烚。如果當年廿三味成功上市嘅話、未必幫得了思教和整改計劃、但總可以制止黃旺兩亂爆發吖嘛!最低限度社會上嘅兩極化都冇咁厲害啦!只要回頭再望一次過去、不難發現罪惡出現咁多麻煩、並唔係單憑反派就搞出嚟。雖然在阿狼揸拂之前、反派遊街示眾猶如家常便飯、但每一次都能夠和平進行、唔似得近年咁爆到通街都係火藥味嘅。若不是狼豬鬥、社會分化亦唔會咁嚴重。唔係我小覷反派、反派只不過是一堆塘底凸之流、冇水係使佢哋唔逳嘅。然而、令到大水沖走城皇廟的又是那些甚麼人、大概無須我講啦!總言之、如果某些人願意從手指罅漏番一啲出來畀過社會、河解自會滅少、而和諧自會增加。


16 則留言:

  1. 因為嗰班友仔知道香港愈亂對佢哋就愈好.....
    相信佢哋仲想再亂多二十年呢!

    回覆刪除
    回覆
    1. 大歸廿載、罪惡城彷彿全城食咗忽得咁、好似首歌咁、飲咗love potion no. 9 個個頭捹捹咁嘅款。

      刪除
  2. 各方勢力搶地盤,用盡污糟邋遢嘅手段,以前係有人會去擺平各方利益,只是罪惡城冇皇管左廿年,於是被各山頭都攪到烏煙瘴氣。
    紅家和揸拂人唔做返場好戲,大家咪齊齊受囉。

    回覆刪除
    回覆
    1. 擺明反紅嘅只係為錢、聲稱愛乜愛物嘅原來都係為錢。所以嘛... ...政治真係邋遢都冇人有嘅。

      刪除
  3. 又係好歌連連,真係聽聽吓想起舞添........

    回覆刪除
  4. 煲濃廿三味拜大少爺所賜,今天佢老人家仲喺度牙屁屁。唔知叫佢做老人家會唔會講老咗佢。

    回覆刪除
    回覆
    1. 佢老人家老當益壯、七十歲人望落只有六十。但佢那次嘅做法就不敢恭維咯!

      刪除
  5. 阿狼將港毒撩出來是正確的

    回覆刪除
  6. 域Sir,乜都假,番邦先想香港亂,然後劍指中原。

    回覆刪除
    回覆
    1. Wai兄、番邦要嘅係錢銀、頭等。所以龍的傳人只能做次等、否則就搞到龍之大國內部鬼打鬼、外部烽煙四起。情況就好似現在咁囉!

      刪除
  7. 凸朗譜上台講明這方面縮水,間接幫了林鄭一把.

    回覆刪除
    回覆
    1. 喪普吹水唔抹嘴、由佢上任至今都係講過唔算數嘅。注於冧井能受惠多少、就要繼續觀察吓咯。

      刪除
  8. 李+X唔係有個乜乜基金? 佢唔係用來做善事咩? 唔係手指罅漏番一D出來嗎? 哈哈, 看來, 一係李+X個基金做唔到野, 一係現在惡罪城唔係某一些人漏番D著數出來, 就天下太平咁簡單

    回覆刪除
  9. 域兄,
    廿年已過,我想社會和人際關係不祇是撕裂而是瓦解,但慨歎為何此城比任何國家和城市快這麼多。
    好好過活新廿載!

    回覆刪除