早知今日何必當初？

當時霸道恃人多

今日躀低嘆奈何

顧得東晴西又雨

遇人唾罵當聽歌

呢嗱、自從玩誓四蠢（常無雄、羅三七、樓小曳、腰痛炎）被公正堂判失去尊貴資格之後、政壇上就有大拃烏繩曱甴走出嚟狂抽落難水。剛啱有壇叫明凸章嘅學者雞跳出嚟話、今次嘅判決是受到人地釋法影響。嗱、呢點算佢講得啱。之但係、佢話「坊間之前可以接受嘅宣誓方式、現在變得不能接受」分明有誤導街坊之嫌。學者雞講緊嘅係「坊間接受」而唔係「法律容許」、所以要小心聽清楚、千祈咪被人家嘅語言偽術誤導呀！其實學者雞十分清楚、法律係絕不容許嘅。據我所見、除咗反紅反上腦一族之外、普羅大眾都不認同宣誓可以係咁兒戲嘅。試問當宣誓嘅莊嚴受到破壞之後、還有啥意義？然而、有人裝傻扮懵亂噏廿四、無非係為咗𧨾街坊捐錢替佢哋鋪鑊而作出宣傳之嘛！加陣啲學者雞有政治冇道義、並顛三倒四般的去混淆大眾視線、到咗呢個時候仲信佢哋嘅話、咁就真係「自作業、不可逭」啦！係嘛？

所謂「人必自侮、然後人侮之」吖嘛！既然玩誓四蠢要挑戰法律、今日亦可以話係佢哋求仁得仁、其他人又何必反應得如此激烈呢？荒謬嘅就係、反盟罔顧事實、監硬將玩誓四蠢嘅咎由自取講成係揸拂堂向全城街坊喧戰。呢班友都算抵死喇、居然以為咁就可以煽動街坊跟揸拂堂嘅對抗、而自己又可以再次食住條水在暗角被發“講難”財。喂、阿哥、阿姐、睇見你哋副猴擒相、就知到你班友從戰中撈來嘅銀両早就花清光喇！嗱、我唔係要潑冷水、而係要講真過你哋聽。其實戰中一役之所以慘淡收場、兼令到反盟聲名狼藉、就係因為你哋教唆班黃衛兵𦧲地𦧲到鬼厭神憎之故。你班人好聽唔聽、偏偏去聽涼茶大狀棍講「不守戒並不等同不尊重戒律」嘅鬼話、而鼓勵班年輕人繼續封街鎖路、簡直係當公正堂發出嘅禁制令係透明嘅。嗱、各位街坊、我唔係嚇你、所謂一件污、兩件穢、當那群後生仔視法律冇到成為習慣、就會萌生出既能做初一、當可做十五嘅念頭、就好似在戰中之後再來一劑怒火開年一樣、到時黃亂、藍亂、毒亂、中亂、西亂、乜亂、物亂、無日無之、罪惡城街坊就真係喊都無謂咯！如果想罪惡城繼續沉倫落去嘅話、那就乜都唔使諗、只要盲目聽從政棍擺布就得架喇！