重煲廿三味？

雞籠若冇掩

刻刻都危險

街坊無得着

制亂要從嚴

今年七一是罪惡城大歸廿年紀念暨揸拂堂新阿頭及其班子就任大典嘅好日子、所以總舵主亦親臨主禮和祝賀。總舵主語重心長的告訴街坊大眾、在一圈兩制嘅政策之下、大圈對本城嘅主權是不容挑戰的。他強調、絕不容許任何人在罪惡城內播毒、更不容任何人挑戰歸本法。嗱、總舵主嘅講話、大概是告訴新任揸拂人“遇神阻誅神、遇佛阻殺佛”不必畏首畏尾。換句話講、即係喊新揸拂人把握時機盡快重煲廿三味、好讓街坊降降虛火咁解。之但係、亂制在議事堂多次甩轆事件之中表現得有點曖昧、難免惹人質疑是否真的是大意失荊州？其實阿邊個新任尊貴以「官商鄉黑」去形容當時形勢、而不用「官商政黑」這四個字、就已經泄露了天機。所以話啫、表面和諧並不靠譜、要成大事必須要下點功夫才行。

看來、新任揸拂人嘅悟性不弱、明白應該先做啲乜嘢。因此佢呢頭上任連張凳都未坐暖、嗰頭就放風要重堡廿三味為罪惡城消暑解熱兼降燥火。假如今次冇人再重演“陣前倒戈”鬧劇嘅話、要搞定那煲廿三味並不太困難。罪惡城經過連番重創之後、民智已經比從前更成熟、人們亦不會再盲目依從政棍指揮棒而舞。今次七一反調大遊街嘅參加人數和籌款所得都是歷年最低、足見在下所言非虛。其實係人都知到、罪惡城之所以像冇掩雞籠般的任由班毒仔毒女胡作非為、就是首任揸拂人在煲廿三味時被架忌冷在背後捅刀而功虧一簣。假如廿三味成功上市嘅話、街坊隨時都可以享用、人自然會變得較冷靜、而罪惡城亦唔會變得成隻焫雞咁款。新任揸拂人似乎與亂制派各個山頭都傾得埋、估計在統一口徑方面嘅功夫會做得比前三位揸拂人較為容易。注於當中要付出幾多代價、而呢啲付出對於普羅街坊嘅利益是否會有所衝突、那就不得而知。但可以肯定嘅就係、只要亂制堅定不移的站在同一陣線上、反派想起飛腳都幾難。問題係、亂制派班人會唔會真的能夠做到“犧牲小我、完成大我”咁誠心之嘛！