勿再累街坊

紅氣騰騰震香江

反盟失策更彷徨

講毒變成燒壞瓦

愛人追殺到洪荒

嗱、開講都有話、冤有頭、債有主吖嘛！意思即係話、自己闖出嚟嘅禍就要自己去承擔。之但係、罪惡城反派一向都唔 buy 呢套。佢哋最叻就係、闖禍之後就拍羅友走人、而讓街坊埋單。戰中如是、怒火開年如是、今次玩誓四蠢被DQ亦唔例外。據反盟傳遞出嚟嘅訊息顯示、他們將會在議事堂內採取不合作態度、以顯示對四蠢被DQ嘅不滿。嗱、你班友玩還玩、千祈咪再累街坊。上周六本來要通過嘅教育界撥款議案、就係因為反盟與敗訴後嘅DQ四蠢在議事廳聯手搗亂而遭腰斬。如果在嚟緊嘅周三再唔通過、撥款就要等到唞暑後復會再議、但撥款是不設追溯期、即係話所有學生嘅津貼都變成水瓜打狗、唔見咗一截。嗱、假如反盟利用自己嘅空間營救DQ四蠢絕無不妥、但利用拖慢議事進程為手段累街坊是絕對不能接受的。反盟今次嘅做法唔止係過份、直程係可恥。睇嚟、反盟在街坊心目中嘅形象、恐怕又要衰多幾錢重咯！

話時話、雖然反盟為DQ四蠢抱打不平而拖大眾落水確係乞人憎、但如果佢哋唔係咁做嘅話、委實係冇其它辦法。事關愛字堆已經部署好打擊反盟嘅陣式、目前等待嘅只係東風而矣！繼支那情侶和玩誓四蠢被DQ之後、另外六名準DQ尊貴「包括：冧桌廷、慢版泉、張漂紅、扮朱迪、松柴鄭、鱒魚鄺、小家樽、尹小癲」亦顯得人人自危。因為佢哋已經深深感受到、被DQ嘅恐懼。對呢班玩嘢精嚟講、呢鋪都可謂始料不及矣！之但係、在旁人看來、今次若非一言堂主動釋法嘅話、日後議事堂就會變成反紅大本營、若然到咗那時才出手、分分鐘搞到遍地人頭。如果真係搞成咁、即係話兩制玩完、剩下一圈架咋！但繼續咁稟落去、容乜易稟到議事堂變成亂制堂架？依我睇、藍衛兵還是得些好意須回手罷！須知到趕狗入窮巷、等同迫隻狗跟你搏老命架咋！如果我係藍衛兵嘅阿頭嘅話、必定會稍為撳住下面班𡃁、唔畀佢哋去到咁盡嘅。因為殺雞儆猴嘅效果已經產生咗、無須做到趕盡殺絕、免得弄巧反拙吖嘛！