胡鬧的官司

常無搞搞震

判頭瞌眼瞓

懶籠非和是

亂棍打一身

呢嗱、講出嚟真係唔知好嬲定好笑。常無坐花廳居然坐出靈感來。佢入稟公堂控告花廳部別歧視。原因係花廳部淨係迫男囚犯剪短頭髮喎！當初常無人稟時、都唔知有幾多人譏笑佢戇居夾無知、甚至連反派架忌冷都揶揄佢不自量力。殊不知盲丙遇上瞎老爺、常無居然獲勝。就係咁、全世界都跌晒眼鏡、搞到通街都係玻璃碎、使得班清道夫淨係掃玻璃都掃到手軟。嗱、呢單嘢唔係就咁埋口、花廳部主管正在搞緊上訴手續。大家不娘拭目以待啦！

姑勿論常無咁做係啱定係唔啱、總之佢就係能人所不能、做人所不做、都可謂夠晒標奇立異咯！你話唔係咩？人做尊貴、佢又做尊貴、人家做到家肥屋潤、而佢就做到坐花廳、淨係潤得個八月十五。今次常無打贏首輪官司、便一下子將花廳沿用百幾年嘅規則砸碎、甚至連懲與教嘅價值觀都得改寫。睇嚟、日後難免事幹多多了！俗語都有講、坐監唔係住酒店吖嘛！監犯嘅責任就係接受懲治和教導。佢哋由被判坐花廳嘅一刻開始、己經失去部份自由和權利架喇！如果唔係嘅話、焉能算得上係懲罰呀？坦白講、連剪短頭髮都講成係性別歧視、睇怕好多規舉都要被廢除架喇！咁搞法、懲教部門仲點算得上係懲教部門？不如改名做罪犯俱樂部好過啦！係嘛？！

嗱、萬一紀律部隊也引此案為例、推翻男性紀律部隊隊員必須剪短頭髮嘅規定。到咗「飛短留長」任君選擇時、保證好睇過六國大封相。當你見到一隊穿著整齊制服、英氣勃勃嘅機動捕快在街道上巡邏時、忽然發現有一個長髮及腰兼遮掩半邊面嘅濟癲般的人物混在其中時、會唔會有篤眼篤鼻之感？會唔會感覺到成支隊伍嘅觀瞻都受到負面影響？所以話啫、呢類咁嘅官司簡直係胡鬧。難道納稅人嘅金錢就應該咁樣花嘅咩、吓？！