恐嚇收風男餘波未了

雖是同行非敵國

抬吹托打各顧各

今日滿城心火盛

冇人把鑊孭上膊

日前凍舟社收風男被平哥社大龍頭皮佬𡅏在危苑「八狗六死」追憶會當眾燒數簿、事後除咗凍舫社出面撐凍舟社收風男之外、其他行家皆三緘其口、由其是收風人協會更加係一改急先鋒作風、居然連屁都冇放一個。凍舫社見到咁嘅情況、便在旗下喉舌發炮猛轟收風人協會就手旁觀兼冇義氣。不過、依在下看來、凍舫社可能對收風人協會有點誤會。嗱、唔信邪嘅就回頭望望過去、每當平哥社、日月社、甚至誠誠社等社團嘅收風同業稍為受到驚嚇時、收風人協會嘅發言人就馬上飛撲出嚟加以譴責、而且仲分分鐘去報官𠻹架！誰敢說收風人協會唔幫行家兼冇義氣？喂、聽講今次都有人去報官喎！會唔會係收風人協會幫咗手冇人知架咋？

古語有云：道不同不相為謀吖嘛！大家都心知肚明、皮佬𡅏最痛恨嘅就係紅家會。然而凍舟社偏偏唔肯同踩紅家會、更加使得唔願做龍的傳人嘅皮佬𡅏痛恨。須知到、皮佬𡅏係經過千辛萬苦、才由龍的家鄉潛巡到罪惡城、又不知經過幾多重考驗才獲得花大叔垂青而登上呀泰區分舵（平哥社）坐館爺寶座。之但係、凍字頭集團卻無時無刻不利用其喉舌攻擊皮佬𡅏、仲踢爆佢係漢奸嚟。咁搞法、確係唔嬲就瓦燒啦！係嘛？！試問皮佬𡅏唔插凍舟收風男還插誰？嗱、如果你以為城中同業人人跟皮佬𡅏有交情、個個都願為佢站台嘅話、咁就真係錯到連阿媽都冇眼睇咯。事實剛剛相反、皮佬𡅏都不知樹敵幾多、只係礙於佢嘅背脊夠硬又夠厚、所以除咗凍字頭集團敢去招惹佢之外、其他人都跟佢保持三分距離。江湖上流傳、收風人協會有多名高層人物跟由花家細作部派遣到來當皮佬𡅏副手嘅西門墨（細字32號、俗稱粗鞋仔）私交甚篤、所以很多時候都會先考慮一吓花家嘅利益然後行事。既然大家都明知到皮佬𡅏係花大叔部署在罪惡城的一支樁、那就惟有裝聾扮啞好了！所以嘛、隨咗對於凍舟社收風男嘅遭遇心表同情之外、其它一切皆都愛莫能助喇！