第一的背後

世貿排名再第一

荷包立到氣都咳

老闆腰肥褲又窄

員工瘦剩皮包骨

紫荊城連續兩年獲得“全球最佳投資城市”冠軍榮譽。嗱、就算話在下又潑冷水都要講架嘞。究竟這個世界第一嘅背後是代表些甚麼呢？不問而知、當然是能夠吸引大量外資投人、以致大商號生意越造越興隆吖嘛！喂喂、咪高興住、須知到當下城中嘅生活成本和租金都是貴絕全球、咁本城又憑乜嘢去吸引大量外資投人呢？簡單講句、咪就係工資低廉囉！嗱、唔係我亂噏、有數據畀過你睇嘅。自從沙氏襲城至今14年裡面、平均工次升咗14%、而樓價就上升咗150%。昭咁睇、係人都知到究竟係誰在享富貴、誰在嘆閉翳啦！係嘛？

坦白講、人人都可以罵揸拂人辦事不力、但富人就唔可以罵喇！點解？之唔係揸拂人重富輕貧囉！吓、點解紫荊人咁好商議、連自己個荷包打倒蹆都冇詐型？唓、唔使問都知點解啦！如果唔係班政棍在政治方面煽風點火轉移街坊視線嘅話、揸拂堂又如何專心為大商號打通發財門戶、大老闆又點會肥到連襪都要別人規佢穿、而班基層街坊又點會“一日過零”咁蝕吓、蝕吓、蝕到入肉都唔發覺？嗱、小市民之所以無緣分享大豐收成果、認真多得揸拂人、政棍、以及你老闆齊齊合作架！所以話啫、揸拂人並唔係低能、更加唔係冇關照紫荊人、而係照顧對象與普羅街坊嘅所想有落差之嘛！大家都有眼睇、揸拂堂眾頭領大幅加薪12%、本屆新任垃圾尊貴雖然冇薪加、但在開設辦事處和資訊科技等項目嘅津貼卻獲得50%增幅、都咪話唔豪。問題係、唔知你份身水又獲得幾多個巴仙嘅加幅呢？你有冇覺得自己嘅賺賣意欲一年謹慎過一年？吓、點解會咁？唓、問吓你自己個荷包就知到答案啦！