戲一場

時逢近七一

爛鬼鬥混吉

縮窒冇錢途

撲水靠賣忽

呢嗱、時逢近七一兼紅家會總舵主親臨罪惡城、丐幫、拳頭幫、眾痴等泛毒組織便把機會、聯手在金花廣場玩佔據、而且今次嘅目標就係豎立在廣場嘅大金花。嗱、千祈咪以為呢班友仔幼稚夾戇居呀！其實佢哋係要話畀世人知到、佢哋就係罪惡城嘅未來政治難民。眾所周知、金花廣場係罪惡城嘅地標、在世界上亦享有薄名。反派當然係睇中呢一點、先至會唔理三七廿一、齊齊擒上在大金花上面晒冷、好讓全城報章、電視、電台等媒體免費替佢哋造宣傳和增加曝光律。呢趟都可謂、係人都知到佢哋係準政治難民嚟咯。將來就可以透過政治庇護嘅途徑、要求前去西方落草…喔…對不起…應該係去西方樂土至係。雖則話、目前尚未係時候去要求西方庇護、但總可以要求提高救濟金嘅金額吖嘛！嘅然係咁、當然要落力演出啦！係冇？

講起嚟、呢三幫人在金花廣場擾攘咗幾日架啦！街坊大眾睇到連自己都納悶起來、何解巡捕房班伙計居然在現場同班友仔你眼望我眼、而毫無展開驅散或拘捕行動嘅跡象？正當街坊們擔心會越來越多滋事者加入、而演變成“二戰”之際、巡捕房終於在總舵主到訪前夕（即28日晚上）展開拘捕行動。在火燭車到場架起雲梯協助之下、清場行動做得快靚正。聽講話、十個大投家之中有九個唔想班友仔焫聲總舵主、所以佢哋只能演獨腳戲。話時話、真係想極都唔明白、嗰班友仔明明係非法集會架啦、但係捕快只係個個棟篤企而唔拉人。俗語都有話啦、禁之於微吖嘛！如果示威坐大咗之後、即使想撳都撳唔嚟。唔通巡捕未卜先知、肯定唔會爆大鑊嘅？嗱、巡捕房老定成咁、如果唔係預先得知其它幫派不會加人嘅話、實在唔知應該點樣解讀。算起嚟、常無和痴瘋都可謂犯案壘壘、佢哋份身家都咪話唔厚。如果眾罪同期齊罰、當然唔使“踎”幾耐監。之但係、如果分開來踎嘅話、以每條罪踎監六個月來計算、睇怕就要踎上三幾年咯。唔通佢哋真係咁有把握、肯定會遇上菩薩心腸嘅判官、再來一次罰即是不罰、不罰即是罰乎？！