多講嫌譖

太爺飄飄然

失覺發狂言

被人搊後腳

補鑊破曉前

想當年、縣太爺尚未係縣大爺嗰陣時曾經講過、官到無求膽自粗。今日當上了縣太爺、雖然不曾宣之於口、卻以一句「每次見寸媒時、都要先唐後番雙語回答同一問題、簡直係麻煩兼譖氣」來展示佢仍然是膽粗過人的。殊不知、收料人協會嘅發言人忽然飛撲出嚟、兜口咬實縣太爺唔放、並質問佢在衙門當差經年、點解唔知到老番報料社係須要番話紀綠片去發放新聞嘅咩？幸好、咱家縣大爺乃屬天才兒童、漏夜發文認衰、嗱嗱聲將事件降溫。如果唔係嘅話、真係有排被人插架！

嗱、講開又講、如果縣太爺講嘅係「每次見寸媒時、都要以白話和北話雙語回答同一問題、簡直係麻煩兼譖氣」嘅話、唔凈止唔會撳着收料人協會粒制、反而可以搏得一輪掌聲都未定架！呢啲就係罪惡城特區嘅特色嚟。其實、收料協會窒得縣太爺啱架！佢身為兩朝元老、由一開始都係要以唐番雙語回答收料員提問、應該習以為常至係。點解到咗今時今日才產生厭煩感覺嘅呢？確實很難怪別人一口咬定縣太爺在擺官款嘅。給予他人有咁嘅印象、難免會變成箭豬嘅。在今時今日這個政治掛帥嘅社會、凡當官者講話、理應有所警惕至係吖嘛！之但係、縣太爺上任至今已經唔係第一次開口𪘁着脷、被人鬧只能說是咎由自取而矣！