此峰不同彼峰

阿峰搵食靠偷雞
有錢唔拎咪使嚟
執起關刀糞裡攪
冚城熏臭犯天威

近日江湖上流傳、埔桔翻艇海難事件當中出現一位年僅三十歲的救人英雄。他是一位內地人、名字叫張皓峰、在海難事件之中讓出救生艇給被他救起的人、而自己就在海上飄浮。雖然他救活了四人、但視作為小事一宗、而且婉拒公司給他十萬元獎金。當我對這位峰哥敬佩不已之際、腦海中忽然也出現另一位峰哥。兩者雖然同叫阿峰、但此峰不同彼峰。講起這位本地峰哥就駕勢喇！佢最鍾意就係向人攞錢。早前佢人稟向巡捕房一哥索償「捕快用手扣搭佢上警車」嘅孖葉費失敗之後、又入稟向監房一哥索償「要佢碌光豬踎地聽監頭訓話」嘅光豬費一萬六千両銀。嗱、攞唔攞到錢暫時未有分曉、但戇痴峰嘅大號又可上頭條喇！免費賣廣告、無笨有精吖嘛！

圈中流傳、戇痴峰志不在區區少數嘅銀両。佢之所以咁做、無非係要拎啲腌臢腥悶嘅本色出嚟畀班捕快和獄卒睇、好讓班伙計日後再服侍佢嘅時候曉得買佢怕架咋！睇起嚟、戇痴峰似乎當正班捕快和獄卒同佢一樣、都係走精面夾縮骨都未定噃！總之係唔係都好啦、戇痴峰嘅尊貴春秋大夢已經發唔成、但係又洗濕咗個頭、惟有拼命去搵啲嘢出嚟搞搞震、並藉此提升其知名道、希望能夠在看更界裡面闖一條康莊大道出來吖嘛！相信大家都睇得出、戇痴峰文唔得、武又唔得、連副學師都做唔嚟、正式係屎坑關刀。喊佢搞破壞綽綽有餘、如果要佢正正經經咁去搵食實聽𢲡兜。所以、如果再冇人泵水過佢洗嘅話、日子將會相當難過。既然本地老闆冇人肯起用佢、惟有去投靠老番、搵份看更來做囉！其實佢啱架、乜你哋睇唔出戇痴峰天生一副看更相、簡直係看更界嘅明日之星嚟嘅咩、吓？！