2018年7月19日星期四

打蚊行動



唔踢永唔逳
有蟲亦懶捉
工夫唔去做
有數搏命篤

近日縣府不斷吹風將會展開一項命名為「打蚊」嘅行動、去取締一個隸屬五獨教嘅小集團蚊族社、使得那群獨仔獨女有如面臨世界末日般的喴嘩鬼叫。此時眾痴頭目戇痴瘋立即跳出來同蚊族社劃清界線、免得被隻蚊陀衰喎!黃仔尊貴亦例牌用把口去替蚊族被抱打不平、指責縣府打壓異己和妨礙結社自由喎!嗱、其實由殖民地年代直至大歸後嘅今天、縣府都係打壓結社自由、而且從來沒有改變過。如果唔信嘅話、大可以去問問城中嘅社團兄弟、看看有那一個社唔係非法存在嘅。講真、今次縣府大概係賊佬試沙煲、隨手搵隻蚊出來際旗、下次分分搬埋把「狗頭閘」出來招呼眾痴都有可能架!所以我提醒戇痴瘋、勿以為做而不認就當朝廷唔知。

講開又講、原來罪惡城真係有法例去管制獨派結社嘅。咁即係話、佢哋嘅集會亦係非法嘅。呢單嘢、確係令到在下𢲷晒頭。事關一直以來、縣府對於講獨行為都只係用把口去講震驚、以及譴責一下、但從來未有引用過甚麼條例去對症下藥嘅。喂、阿哥、到咗家陣至講出來、會唔會有不按本子辦事嘅嫌疑架?如果翻起舊賬上來嘅話、豈不是有好多人賴嘢?要問責架、唔驚嘅咩、吓?!但諗深一層、好似又唔會有乜嘢大不了嘅。橫掂對朝廷嚟講、這裡山高皇帝遠兼鞭長莫及、極其量都係派個專員到來、開口𠼮吓班大老爺做番啲嘢畀街坊睇咁大把。最多咪就係、朝廷踢一腳、縣府逳一逳囉!再講吖、問責呢家嘢、點問、點責、你同我、甚至連縣府都唔係咁清楚架咋。否則、點會發生咗咁多被街坊鬧爆嘅事、硬係冇一趟有人被問或被責過嘅?依我睇、呢趟嘅打蚊行動絕對唔關朝廷事、完全係縣府自動自覺、而且非常樂意去做嘅。誰叫呢班獨派周身唔通氣、累到反盟形象越來越似豬八戒照鏡、兩邊不是人咩?嗱、就當係講笑咁講、如果蚊族社社長臣號腆忽然公開宣布、話佢哋一直以來所有表現、都係為咗製作一部反面教材式嘅社會實驗電影而做、唔知咁又甩唔甩到身呢?

15 則留言:

  1. 罪惡城有例去管班大帝嘅所作所為,就有人話左好耐架喇,不過縣府係都唔用,亦冇佢符啫。

    回覆刪除
  2. 你點吹水奈你唔何,但你申請縣府梗係唔批喇!

    回覆刪除
    回覆
    1. 聽聞話、呢趟可能連水都冇得吹咯!

      刪除
    2. 呢啲咪縣府聰明之處囉,故意放縱,結果班友仔貪勝不知輸,以為得吋可以進呎,結果一舖清袋!

      刪除
  3. ☾*。。💫好友🌜甜夢安睡☁。。゚๑🌛
    🌟開心萬事得🎈╠╣aΡpy週五✨
    ╔══╗────╔╗╔═╦╦╗─╔╗╔╗♦
    ║╔═╬═╦═╦╝║║║║╠╬═╣╚╣╚╗☆
    ║╚╗║╬║╬║╬║║║║║║╬║║║╔╣★
    ╚══╩═╩═╩═╝╚╩═╩╬╗╠╩╩═╝✬
    ──────────────╚═╝晚安º¨⊹

    回覆刪除
  4. 冇問責?因為最大嗰個都唔使問責…
    仲有,邊個會想做衰人、醜人,做咗就一定係豬八戒照鏡!

    回覆刪除
  5. 域Sir,香港笑柄之一,高官問而不責.

    回覆刪除