蠢

盲丙扮晒醒

亂咁將人整

買板唔知埞

衰格夾難頂

江湖流傳、一名在椰樹省三每口市拍戲嘅禾日城女導演在酒店睡覺時、機乎被鄰房嘅一名飛機師學徒強姦。當女導演驚醒過來時發現有一名陌生男子對她有所動作、便猛力將他推開、然後揮動雙手猛打該男子、直至他退出其房間為止。事後女導演跑到三每口市派出所報案、但坐堂嘅值日衙差卻一味勸她和解！其間、有人警告她、若然堅持落案嘅話、她本人亦會被控以毆打他人罪。由於事主不懂當地法律、惟有離開派出所、然後返回禾日城、繼而在飛時卜上公開此事。嗱、當事情公開之後、很自然地在互聯網和輿論界牽起一陣嘩然。好嘞、當事情鬧大之後三每口市派出所通知女導演、沙嫌果子已經被捕、並要求事主前往派出所落口供。

嗱、我並唔打算討論事件之中是否暗藏利益輸送這類問題。我講緊嘅係、在今時今日這個資訊發達年代裡面、居然仲會有差人蠢過隻豬、連來人是何方神聖都搞唔清楚就胡亂拋人家浪頭、委實無知到令人驚訝！開口有話、就算要「蝦仁」都要睇定啲先、然後才起筷吖嘛！今次嘅事主係一名教人演戲嘅專家嚟、而呢班盲丙卻貿貿然咁去「恰」人、咁咪攞嚟衰囉！仲有呀、椰樹省係中央落重本去經營嘅一個具代表性嘅重心城市嚟、呢班二打六居然驚衰得唔透徹、好惹唔惹去惹一名禾日城導演、搞到個互聯鬧爆大六衙門冇個好人、分分鐘會傳到阿爺隻耳仔度吖嘛！呢班友仔梗係壽星公弔頸、嫌命長都未定咯。點解連三歲小孩都懂得驚嘅嘢、班死牛龜咁大隻嘅衙差居然買板唔知埞嘅呢？難怪有咁多人都話、上面當差嘅人人錢揞眼、個個冇心肝啦！嗱、今次呢件事最終會唔會被依法辦理、我唔知到。但我睇得出、上面打貪還有很長很長的路要走。如果唔將下面班蛇蟲鼠蟻肅清嘅話、打幾多隻大老虎亦係徒然。前線公人是直接面對街坊的、佢哋嘅行為好與壞係直接影響到街坊對管治當局、甚至國家領導人嘅觀感。誰敢掉以輕心、誰就輸硬。