衰到冇朋友

盡棄倫常妖孽興

捩橫折曲有收成

今日恃蠻掩道理

只緣道理已輸清

嗱、惡人大家都見得多、但係惡到好似笠機峰咁、欺凌完保安姐之後還要惡人先告狀、向訴苦專員誣告受害人嘅、你又見過未？咁仲來算架、黃仔政棍加埋佢哋嘅喉舌齊齊在社會上造勢、老屈保安姐係公家派去監視垃圾尊貴一舉一動嘅臥底、反咬保安姐侵犯尊貴私隱權。嗱、你話嘞、如果呢種撞棍式嘅奸計得逞、咁仲成世界嘅？幸好、本城嘅倫常道德尚未完全淪陷、訴苦專員能夠秉公辦理、並對笠機峰嘅無理指控續一反駁、令到其奸計夢成空。由此可見、今日嘅飯盟已經走火入魔、不再是昔日和理非非（和平、理性、非暴力、非粗口）嘅反盟。今日嘅飯盟已經變成一群不知倫常為何物嘅極端群體。所謂人棄倫常妖孽興、難怪罪惡城妖氣沖天啦！

在笠機事件之初、過氣白鴿會坐館瞓街姐就跳出來狂插笠機峰不是、所以連白鴿會唔肯撐佢、仲立即凍結佢嘅會籍。由於笠機峰惹起公憤而被全城鬧爆佢之故、迫得佢死口死面咁企出嚟當眾認衰仔。點不知、當大撞幫連同獨派人馬齊齊開聲撐佢之後、白鴿會亦隨即改變初衷硬挺笠機峰。笠機峰因而大喜、於是乎打蛇隨棍上、向訴苦專員指控保安姐侵犯垃圾尊貴私隱、又話佢係公家派去監視尊貴嘅臥底嚟。唔止咁呀、班黃仔尊貴還提議垃圾會升堂公審保安姐喎！嗱、呢班友盛氣凌人到咁嘅地步、家陣罪惡城係咪由佢哋玩晒？喂、白鴿會嘅阿哥、阿姐、到底你哋知唔知到係一錯再錯、錯到神憎鬼厭架！話口都未完、白鴿會即刻被全城鬧爆。呢回又踏咗屎喇！咁大個白鴿會、竟然連自己講過嘅話都守唔緊、人家大撞幫隨便發幾句噏風啫、成班白鴿就馬上轉軚、以致通通都撼頭埋牆。搞成咁、係因乜解究架？照咁睇嚟、白鴿會距離淪落到九流幫會嘅日子不遠矣咯！須知到、政治呢家嘢係又陰狠又毒辣嘅玩意嚟、如果唔曉玩嘅話、不如蹆番個身出嚟、正正經經咁撈份正行搵兩餐好過喇？知冇？