爛泥唔上壁

監倉當成大酒店

膳食要求更腌臢

只道威風來得易

誤把砒霜當食鹽

因在六判堂撩鬼攞命、而被六判爺送人大牢摱鐵枝嘅丐幫副幫主旺好名一出冊後、就開咪投訴監倉膳食味道曳兼食唔飽。但奇就奇在、從旺好名外表睇嚟、佢依然係肥屍大隻嘅、唔通佢真係餓到發水腫？之但係、白鴿會過氣會長瞓街姐就話、佢經常以盛世紳士身份巡視監倉、亦多次𢲡過犯人嘅飯來試食、覺得味道和份量都唔差嘅喎！究竟邊個先至係大話精呢？呢嗱、話口未完又輪到丐幫幫主唔忿軟又被六判爺判處入羈留所等候判刑。話明冇諗過會踎監嘅唔忿軟、今次唔止有機會去嘆吓水飯房膳食、而且分分鐘在監倉坐出得美好人生出來架！

話時話、踎監呢家嘢已經好多人嘆過架喇！之但係、人踎監、黃仔又踎監、別人踎完出來都冇兩句、獨係班黃仔（例如、常無賴被剪短頭髮、而籮半蔥、兜捹匡、戇痴瘋旺好名等）踎監都踎得特別招即、而且特別多忌忌吉吉嘅。不過、正如常無話齋、從前犯這種事都係被判做吓義工之嘛、家陣動不動就判入冊、擺明係政治迫害嚟。由此可見、呢班黃仔根本上從來都冇諗過會踎監嘅。嗱、罪惡城街坊選出（攴嘢媜、支那行、常無、籮半蔥、牛小矋、夭重閹、插旗井、笠機鋒）咁樣嘅一群、成事不足、敗事有餘嘅黃仔出來代表自己、都咪話唔夠瘋刺。呢班人裡面、有人連一日尊貴都未做過就衰咗、有人中途被罰出場、現在還有兩人嘅去留前途未卜。然而、佢哋共通點就係、全部都係自作自受兼白費街坊選票。點解只係黃仔尊貴至會搞成咁？是政治迫害、抑或係佢哋自己攞嚟嘅呢？相信大家心中早已經有答案。點解會有這種嘩眾取寵而搞到一鑊泡嘅人物成為尊貴呢？答案係、有咁嘅選民、才會有咁嘅尊貴。點解有咁嘅選民？答案係、形勢造成嘅。點解會有咁嘅形勢？答案係、管治集團人在心不在之故。