花拳繡腿（六）

點人唔使本

同撈砸飯碗

獨食夾番蠻

親離兼眾叛

呢嗱、做花朋友分分鐘踩西瓜皮、仲𨃩到攤攤腰𠻹架！雖然喪普上任不久就冚袋鼠一哥氹寶電話、但氹寶卻不計前嫌、依然對喪普言聽計從。可惜嘅係、氹寶當正喪普係好大佬、而喪普只當氹寶係傻佬。喪普曾經老點氹寶、指紅家嘅燶興和華喂兩家電設公司嘅真實身份係紅家無間道、對袋鼠家族安全構成危險。氹寶聽後㷫過焫雞、並下令全族停止使用紅家嘅通訊設備。然而、喪普跟閘王講掂數之後毅然公布、為咗打救紅家勞工個飯碗、正在與閘王合力盡快使被封殺嘅燶興在花家恢復營業。就係咁、氹寶忽然發現自己踏咗屎。因為氹寶早前衰衝動、公開指責紅家特工滲透其家族、並且不惜當花家馬前卒、不斷的在南海問題上挑戰閘王。現在忽然發現自己做咗傻仔、想話到紅家作客也不獲發給簽證。當氹寶食飽閉門羹之後、惟有派遣貿旅部長橋攴到紅家睇攬球兼修補一下雙方關係。

嗱、所謂識時務者為俊傑、象家大佬摩囉迪雖然機乎跟閘王開片、但佢勝在曉轉彎。當佢見到閘王快要跟喪普打貿易戰、便靜雞雞跑到紅家嘅女兒城跟閘王密堪、看看有冇死雞可執。架仔大佬安屁亦一反常態的向紅家示好。當紅家大總管李亞二到訪架家時、安屁除咗擺出友好姿勢之外、還安排他們的天皇老子跟李亞二見面。有消息指、紅家、架仔、高麗三家正在合力將「大東亞自由貿易區計劃」擺上議事桌。歐盟剛剛宣布不用花銀、以示對喪普不滿。那位有份賊喊捉賊嘅得意豬一姐默大嬸亦應紅家大總管李亞二邀請、將於本月廿五日到紅家作客、商議有關紅得及紅歐未本關係。嗱、現在班花朋友已經被喪普掠到一頸血、為咗找個夠份量嘅靠山來對抗喪普才諗起紅家。因此、那群花朋友嘅笑容裡面是藏着一柄刀的。佢哋嘅目的只係要利用紅家為籌碼、去迫使喪普改善其「躝癱大佬」作風、咪過連架忌冷都照掠。假如紅家以為花朋友真心與之聯手制衡花家嘅話、那就大錯特錯。過去和現在都已證實、白番對龍族嘅戒心係有增無減的。當呢班人有着共同利益嘅時候、必會聯合起來打龍族嘅主意。古語有云：“銅為鑒、正衣冠。史為鑒、知興替。人為鑒、明得失。”但願龍的傳人打醒十二分精神、切勿被眼前假像所騙。