咁都唔使坐監

你造反時我眼坦

成盤生意冚包散

今日爾能當好運

惟獨是我被玩殘

當日涼茶杰對黃衛兵講“不守戒並不等同破戒”原來唔止係啱嘅、而且仲係其道不孤𠻹。昨日六判爺判決四名犯天條嘅黃衛兵守行為一年、另罰每人一萬両銀了事。據六判講、當中有人只係睇唔過眼捕快對黃衛兵「開拖」才在當天加人對抗、唔算得上係挑戰法律、亦唔算得上係骨幹角色嚟喎！嗱、唔知咁講法、算唔算得上係「猢狸鬧交」呢、吓？！雖然罰款一萬両銀唔算太少、但阻遏作用就冇乜囉！聽聞話、合格黃衛兵是獲得金錢上援助的。無論點睇、黃亂在社會上造成嘅災害都唔係小嘢、我老友阿黃盤生意就係死喺佢哋手上。如果黃衛兵不是遇上菩薩爺打救嘅話、恐怕難逃摱鐵枝嘅滋味。嗱、好戲陸續有來、大家就等着瞧吧！

講開又講、黃亂搞手一定知到冇可能贏得過紅家會的。佢哋之所以死纏爛打、無非是要達成今日嘅愁城自困地步。嗱、我冇亂噏架！從今日嘅情形嚟睇、黃亂搞手守護嘅價值觀並不屬於罪惡城、而係花米兩旗嘅。你睇、自從黃亂之後、一言堂便敕法將箍着本城嘅金剛圈再度收緊。由此可見紅家會就早聞到𤓓味。如無猜錯嘅話、在未來歲月裡面、個金剛圈勢必越收越緊、而且仲係有緊冇鬆。正如紅老大在南海對付花大叔一樣、有進冇退。君不見、紅家會在南海填海造陸、將幾六個荒廢着嘅島礁填成具非常戰略價值嘅島嶼、就是鐵一般的證據嚟咩？自從花家踩隻腳人去南海之後、紅家就踩夠兩隻腳入去嗎？例如東海釣魚島、若不是架仔帶頭搞鬼、紅家會又點會派遣巡邏船在該區作常態巡邏？再睇睇台島、若非菜英子發夢都掛住島獨、紅老大又點會頻頻派遣紅家軍在該區作戰略性巡航？這些舉動足以證明當今紅老大嘅性格、就是你踩前一步、佢踩夠兩步。即係話、黃衛兵繼續惡搞嘅話、唔止係茅廁點燈、仲會連累街坊都冇運行。可惜嘅就係、平常百姓皆是無可奈何而矣！