自尋死路

唔怕搏大堆

最弊唔知衰

行前打後蹆

注定進坑渠

記得上次垃圾擂台大決賽、守門神一方面話要阻擋獨派進場、而另一方面又瞓捩頸任由多名獨派人士入閘兼成功取得議席。當時在下完全唔明白、點解守門神做嘢咁流口水嘅。之但係、當獨派五人連同反盟一人被驅逐出垃圾堂之時、在下登時恍然大悟、那是請君入甕之局。嗱、從表面上睇、反盟這屆打擂台成績（加埋獨派六名入選者）比往屆多添一席。實質上、反盟一共失去五席才對。雖然亂制派嘅總成績亦失去一席、但今次嘅重賽一共有六個空缺、如果能取得其三嘅話、呢屆垃圾堂就係亂制嘅天下。之但係、江湖上流傳、反盟有能力全部奪回去。但我就唔係咁睇好喇！

須知到、反盟在上仗之所以有咁多人墮馬、並唔係因佢哋年紀老邁、而係佢哋個朵已經臭晒。假如唔係亂制派有某位話事人暗中出手幫助常無嘅話、恐怕最後勝出嘅已經係哪𠾵而非常無。反盟之所以大敗、其中只要原因就係拉布。反盟太過低估選民嘅智慧和耐性、以為單憑佢哋那套將黑白混淆嘅伎倆就騙得過街坊、結果證明佢哋係錯嘅。其實、垃圾堂拉布引起嘅反效果、跟戰中期間旺區那群打起「幫兄弟」旗號嘅「兄弟幫」所造出嘅反效果完全一模一樣、都係越幫越“亡”嘅。心水清嘅街坊早己睇出、率領兄弟幫向捕快發難、以及帶頭拉布嘅都係同一夥人。戰中令反盟聲名狼藉、拉布令反盟神憎鬼厭。如果班友仔連咁都睇唔出今次重賽就係要佢哋徹底失敗嘅話、不如趁早執定包袱等收皮、無謂留喺度令街坊眼烟喇！反盟在不知不覺間已經背棄和理非非、背棄應有道義、並與街坊期望越走越遠。當下某位元老級人馬居然跟獨派結盟玩獨。咁你話嘞、此人係咪晚節不保、係咪應死唔使病？難怪有咁多金主都煞停對反盟泵水咯！