得不償失

落叠有凶吉

難分白與黑

接受難消化

拒絕冇腰骨

昨日涼茶大狀話、假如蟻民接受紫府大總管冧井所提出嘅「代住仙」的話、紅家會便可以向外界宣布紫荊堂新家規已經落實、而堂主施威便可以憑着假認受性加倍作惡、到時紫荊人就「係咁先」架喇！在下對涼茶大狀講嘅話向來都聽唔入耳、不過今次就覺得佢錯唔晒。主要原因就係、我亦曾經聽人講過、最驚就係由涼茶大狀憑着「真補丸」當上金紫荊揸拂人、佢就可以恃其權勢向花旗行善、將金紫荊嘅種植秘方贈予山姆大叔、到時紫荊人就得不償失架喇！

呢嗱、紫荊城無論禍福皆不離「真、假」兩個字。但到底何謂真、何謂假就從來無人敢於企出來加以界定。如果認同某些尊貴平日口噏噏、話自己係被群眾選出來才能夠體現民主嘅話、那麼點解有超過一百八十萬名市民簽名反對封街鎖路、他們居然視如不見呢？難道在他們心目中、一百八十萬人還不夠資格體現民主？說穿了、這就是矛盾所在、亦反映出人類嘅自私。因為有一隻名為「輸打贏要」嘅心魔已經在不知不覺間漸漸入侵並佔據人類嘅思想空間、而且直接將人類嘅視野和思維導向單邊化。

今天人人講價值觀、個個說公平、公正、公開、但顯現於人前的偏偏只係自私、自利、自閉。今日之所以人人都感到唔開心、無非是一個「騙」字。想重拾過去嘅歡樂時光唔係唔得、只係有太多人唔肯啫！