公仔台風雲錄

三個老闆鬥縮骨

視台慘變神前桔

錢銀講來有數計

搞你唔掂玩陰質

老牌公仔台近卅年來數番起落、似乎已經成為常態。該台換老闆有如三水佬睇走馬燈一樣、令人睇到眼花撩亂。今期三大老闆「寶島菜、紫荊茶、神州鰉」打三隻腳麻雀打到反枱、而且還要搞到對簿公堂。據說手上籌碼最多嘅寶島菜闆曾經借錢畀公司、但條件就是要公仔台以「跳樓貨」價錢替他旗下集團賣廣告作為償還而埋下火種。後來紫荊茶邀得神州鰉加入、形成二對一之勢。雖然法律規定若非「舵地人馬」不得成為公仔台嘅實際揸拂人、但神州鰉卻暗中從紫荊茶手中獲得更多籌碼而成為老大。寶島菜見自己嘅老大地位被奪條中氣便扯上扯落、於是向公堂狀告神州鰉、指他非法揸拂。雖然寶島菜終於贏了官司、但卻輸咗個勢。從牌面睇、公仔台揸拂人是一家「墊股」公司、但實際揸拂嘅依然是神州鰉。之不過今次神州鰉寧願借錢畀伙計開飯都唔肯借錢畀公仔台渡過難關、就被阿某人在眾議堂上破口大罵。

呢嗱、大概呢啲就叫「阿蘭嫁阿瑞」累鬥累嘅結果。有錢人大把銀兩當然玩得起、但下面班伙計就無端端成為受害者、都咪話唔閉翳。現在神州鰉借錢畀伙計開飯、但拒絕借錢畀個台、大概是唔想有出冇入。因為有借就有還、注資等同泵水入個無底深潭、真係蝕死都未天光啦！係嘛？之但係眾議堂阿某人居然擘大喉嚨大罵神州鰉玩嘢、仲用律法去恐嚇人家、但卻不見他罵同樣有玩嘢之嫌嘅寶島菜半句。唔知阿某人明唔明白、假如神州鰉縮沙嘅話、班伙計就要吊起個沙煲嘅呢、吓？到時唔知阿某人又會唔會畀錢幫公仔台班伙計呢？所以話啫、有啲人心目中大概只有政治而毫無道義嘅。總言之阿某人從來不管是非、但凡是來自祖家的人或物一律鬧咗至算。喂喂、千祈咪以為我對阿某人有偏見喎、其實我只係以議事論事架咋！根據最近民調顯示、阿某人嘅排名跌咗落去榜末、即係由尾數上嚟排第一。因此唔妥阿某人嘅係城中大眾、而唔係區區在下呀！