我們的社會是這樣的嗎？

政爭鬧爆門常開

議會慘變戰鋒台

民間怨忿無人問

怒喝儒生勿種災

紫荊議事堂部份尊貴被踢爆公器私用、開放堂中設施讓自己友作戰中指揮部。某尊貴在回答記者提問時堅稱自己冇有錯、日後如果不是非常時期就會自律。換言之、潛台詞就是只要他認為有須要唔時候、必定會重蹈覆轍、問你怕未？喂喂、議事堂乃是全城納稅人嘅資產、而納稅人之中亦包含所有不同政治立場嘅市民、所以尊貴並唔係大晒、更加唔應該私底下動用公家設備供給外人使用。因為這樣等同假公濟私、對持不同政治立場嘅納稅人唔公平、即使在法律上並不構成罪名、但在道德上是可恥的。在下奉勸各位尊貴一聲、如果要幫助自己友就唔好咁孤寒、索性自己掏腰包去酒店開房、而不是濫用納稅人資源。假如你嘅對手又咁做嘅話、議事堂豈非變成冇掩雞籠？

講起紫荊議事堂就火都嚟埋。那些所謂尊貴總是為維護背後勢力利益而吵吵鬧鬧、晒標語、講粗口、掟香蕉、掟路姆西毛公仔、搞到整個議事堂變成大笪地咁款、而市民利益就冇人跟進。所謂掟人者、人亦掟之。君不見戰中期間有尊貴被人掟雞蛋嗎？所不同嘅就係、尊貴在議事堂掟人就被趕出場、而市民在公眾地方掟尊貴就被人送上差館而矣！請大家睜開雙眼看清楚、自從大歸以來紫荊議事堂究竟對市民有過甚麼貢獻？住屋問題改善了嗎？骨灰場不足問題改善了嗎？答案係、目前城中基層面對着生前難覓安居所、死後無葬身之地之苦。還有年青人出路越來越狹窄、向上流機會所見不多、社會資源分配越見傾斜、以致富者愈富、貧者愈貧。咁你話社會上點可能冇怨氣？以其抵賴年青人破壞社會安寧、倒不如想想辨法去紓解民困和消除民怨來得更實際。其實有幾多人參與街頭運動唔係反對派話事、而係由政府來決定吖嘛！如果社會上民怨唔係咁高漲嘅話、阿茂得閒去鳩鳴咩？