2014年12月24日星期三

肥龍入冊



阿龍今入冊
此後冇龍刮
既知監獄苦
何必偏作賊

過氣金紫荊老二肥龍受賄罪名成立、被判監七年半、扣除所有下難大概只須要坐五年半左右。呢嗱、唔講起真係唔知到、原來有好多人為肥龍求情、由其是他的拜把兄弟前金紫荊老大啱僧的求情信內容、將肥龍吹成是金紫荊大救星似的、彷彿應該馬上將他釋放才對。看來啱僧這位沙煲兄弟都可謂義薄雲天、在自己蘇州屎纏身期間、依然肯伸出同情之手、即使它朝有日窄路相逢、做大佬嘅啱僧亦無愧於細佬肥龍矣!

所謂夫妻好比同林鳥、大難臨頭各自飛吖嘛!當肥龍被判罪成之後其太座龍嫂便公開澄清與肥龍是財政分家的、意思即係話老娘好手上嘅銀両一概與肥龍無關。念在夫妻一場、龍嫂揚言只會為肥龍申請法律援助其上訴。勿謂龍嫂無義氣、其實她肯替肥龍申請法援已經很不錯、比之那位收咗肥龍八百幾萬両銀嘅外遇飛雞姐連鬼影都唔見好得多架喇!在刑堂作供時、肥龍承認自己大洗、還披露出前講馬部老總尿龜曾經以一千二百萬両銀接濟于他。然而具玩味的是、大判官只勒令肥龍交還陏款一千一百一十八萬両銀。不過據說破產受託人將會追討肥龍過去五年內相關交易、因此飛雞姐收到的八百五十萬未必能夠袋袋平安的。

呢嗱、所謂同人唔同命、買板要知埞。紫城嘅肥龍又係龍、馬城嘅勾龍又係龍、大家同樣是罪犯收受地產鋪銀両、但肥龍只須坐監七年半、而勾龍就要坐足二十七年咁耐。試問此間差距何其遠?所以話啫、肥龍亦無謂再搞動作、不如安心在監房度過幾個寒暑、待出冊之後才作火燒旗杆好過啦!

20 則留言:

  1. 有咁耐風流有咁耐折墮!
    聖誕快樂呀!

    回覆刪除
    回覆
    1. 呢啲大概就係貪字得個貧喇!
      新年愉快!

      刪除
  2. 老妻與空姐同時曝光,又一幕人間百態。新年快樂!
    祝聖誕及新年快樂!

    回覆刪除
    回覆
    1. 對呀、紫城日日都有戲睇。
      祝新年快樂!

      刪除
  3. 夫妻財產分家, 此乃明智之舉, 吾則清算起嚟, 連渣都凍過水.

    回覆刪除
    回覆
    1. 對呀、出得來行、通常都有兩手準備的。

      刪除
  4. 域 Sir,許仕仁一向自視甚高,若果你三樣唔識一樣,歌劇,红酒或賭馬,佢根本唔同你傾計,自從官司開審後,呢三樣嘢都戒埋,依家仲要一嘗鐵窗滋味,正式是有咁耐風流有咁耐折墮,我成日教我仔女,做人要安守本份,千萬不可做違法的事.

    回覆刪除
    回覆
    1. 在1978年當此君在廉記出任社區關係處AD時、在下曾與他接觸過、只知佢嘅轉數好快、而且態度十分謙虛。可能後來官做大了、人就變咗喇!

      刪除
  5. 分享快樂❤自己更快樂❤齊齊都好快樂❤聖誕節超快樂喇喂
    ღ天天開心的心情延續到每一個新年ღ。・゚゚・。。゚♡
    ∧∧。・゚゚・。。゚❤Merry Christmas & Happy New Year
    ・ω・)。・゚゚・♡¨*•♥・✾。大家時刻過得歡樂精彩°¨*。ღ
    ⊂ノ
         *゚*°☆•♩¤。♪.♬。¤•✬:。⊹♫*。★.•:。✫¸.•*¨❉•.。
    ılılıll|̲̅̅●̲̅̅|̲̅̅=̲̅̅|̲̅̅●̲̅̅|llılılı
    ♦♬*♪Ϡ₡*•♫*Ϡ₡*♦♫•Ϡ₡*♩♪•.Ϡ₡*•♦♬.♩•*Ϡ₡•*♫*♦

    回覆刪除
  6. 域兄晚上好,
    今晚平安夜喎, 早上成街銀紙有冇執番 d 洗吓呀 ?

    行 路 頭 耷 耷
    皆 因 有 錢 執
    三 千 五 百 萬
    佳 節 暖 笠 笠

    回覆刪除
    回覆
    1. 華娃兄午安、在下只從電視見到有錢執、所以有得睇、冇得執喇!

      聞得有錢執
      手快步又急
      畀人當賊扮
      拾者聽通緝

      刪除
  7. 祝願UncleRick及家人共度一個溫暖愉快的聖誕!!!^^

    回覆刪除
  8. 左計右計,肥龍都有贃,呢次係意外,如果唔係籠裡雞作反,佢可能重喺法國嘆緊紅酒,睇緊歌劇! 至於勾魂龍單畸屎就好唔同,俾佢喺出面多一日,對前凸首會係一個威脅,所以為咗免除後患,起碼要確保佢喺未來二十年都唔可以出嚟,到時前凸怕且已作仙遊,就算翻案都無用!

    回覆刪除
    回覆
    1. 聽講話呢單嘢各方都就住就住、否則隨時會由地雷變成核彈。

      刪除
  9. 聖誕新年愉快~~
    聽來很 "行貨" ... 卻是衷心的!

    回覆刪除
    回覆
    1. 只微、謝謝祝福。在下也祝君新年愉快!

      刪除
  10. 照計佢冇理由刮得甘少 , 應該收埋吾少

    回覆刪除