2014年12月28日星期日

吹水唔抹嘴



政客發噏風
口水似暴洪
但憑三寸脷
引你入迷宮

在戰中期間、繼李工頭夾硬將捕快描繪成黑警之後、毛姑姑亦唔蝕底、她將今日嘅捕快與六七年大暴動嘅防暴隊相提並論。喂喂、毛姑姑、點解你咁鍾意別人當正盲巫咁點架?我話妳知啦、六七年防暴隊使用防暴警棍和催淚彈之外、還用上手鎗、木彈鎗、步鎗、散彈熗、等致命武器、比之今日捕快使用嘅催淚彈、胡辣噴霧、伸縮棒或防暴棍、簡直係蚊肶同牛肶、根本無可能混為一談。身為阿民金牌打手質素尚且如比、難怪阿民聲勢日走下坡啦!

講開又講、今次巡捕房嘅差大哥雖然被阿民砌生豬肉、又被黃遮黨熱切問候家中女性、但起碼還有紫府和阿建撐佢哋。難為有一支只有人踩、永冇人撐嘅文職執法隊伍一年到晚都被人熱切問候全家、即使帶犯入差館落案都要睇差大哥面口、甚至有媒體稱他們為欺凌弱勢社群嘅惡魔、人家亦只係嗗一聲吞落肚架咋!吓、是啥隊伍咁忍得?咪就係日日被人罵食 C and市狗嗰隊販管隊囉!坦白講、近四十年來差大哥被捧成大丈夫、在公務人群中有如鶴立雞群、現在係時候好好的向其他部門嘅同僚學習一下何謂謙卑喇!話說回頭、雖然在今次事件之中有個別捕快行為較為過火、亦有小部份人涉嫌濫用私刑、但憑良心講句、以整體而言這支隊伍嘅克制能力是當世一流的。注於某些與黑幫大佬拍晒膊頭嘅政棍是黑是白、基本上係逃唔過市民嘅法眼、那麼差大哥就無謂將那些屁話放在心上喇!

所謂有政治無道義、在我印象之中當年南天書生領袖王蛋是一個敢講實話嘅硬漢子。不知是否寄人籬下大久之故、人就變得不一樣。例如今次他居然荒謬到指責本城捕快施暴程度已經達至極權國家水平。點知好死唔死、花旗官差當時正在世人面前狂打示威者、力度之猛比之本地捕快有過之而無不及。難道花旗就是極權國家嗎?王蛋呀、王蛋、你咁鍾意亂扣人家帽子、不如唔好再叫王蛋、改名叫王八好過啦!

11 則留言:

  1. 域Sir ,以前我成日睇TVB英文台,因為我想學好英文,殖民地政府識講兩句英文搵食容易些,所以見過毛小姐報告新聞,有些印像,比人様靚英文一流,唔知後來又走去做政棍。

    回覆刪除
    回覆
    1. 毛姑姑個老伴係洋人、所以佢那口洋話講得很地道。但係佢做咗政棍之後、嘅一口唐話就不知所謂。在下指嘅係當佢指責政敵嘅時候所講嘅話而矣!

      刪除
  2. 以前我對毛小姐都幾有好感,因佢反應快、敢言……後來名利有了,霸氣多了,有點似黃毓民作風(有佢講冇你講),咁就俾人覺得好猙獰!
    人老就容易自我膨脹呀。

    回覆刪除
    回覆
    1. 從表面上睇、毛姑姑確有幾分霸氣、可惜內涵欠奉而矣!

      刪除
  3. 域兄晚上好,
    昔日小販管理隊 (HCF) 是現今食環小販組 (HCT) 嘅前身 , 但兩者的權力就差天共地喇, 俾其他部門睇唔起都算啦, 俾人罵兩句都要忍吓喇,

    壹四尚餘三兩天
    回顧過去嘆無言
    荒謬事情輪流演
    人性醜惡盡展現

    回覆刪除
    回覆
    1. 華娃兄你好,

      官爺遇事怕牽連
      紫城人皆欠自然
      政棍無能小子上
      鳩嗚伴你過新年



      刪除
  4. 吹水唔抹嘴?!對政棍黎講已經算厚道了!

    回覆刪除
  5. 所以話香城嘅政客有幾叻?睇吓佢哋發表嘅言論就一目了然!

    回覆刪除
    回覆
    1. 如果唔係咁、又何須被班細路點到頭擰擰?

      刪除